Fréttir



Fréttir

  • IMG_1810

Vinabær Hafnarfjarðar frá Kína í heimsókn í síðustu viku

11. sep. 2017

Sex manna sendinefnd frá Baoding, vinabæ Hafnarfjarðar í Kína, sótti bæinn heim á dögunum. Fyrir hópnum fór Li Junling, staðgengill borgarstjóra Baoding, og áttu hann og Haraldur L. Haraldsson bæjarstjóri saman fund þar sem rætt var starfsemi bæjarins, innleiðingu jafnlaunastaðals, verkefni heilsueflandi samfélags, vaxandi atvinnulíf í bænum og umhverfismál.

Hópurinn hafði sérstakan áhuga á að kynna sér jarðhita og nýtingu hans og heimsótti Reykjanesvirkjun og fræddist um auðlindagarðinn sem nýtir auðlindastrauma frá jarðvarmaverum á Reykjanesi og fór í skoðunarferð um Seltún í Krísuvík. Þá fór hópurinn í heimsókn í Áslandsskóla og fræddist um skólastarfið þar og yfirstandandi iPad innleiðingu, heimsótti matvælafyrirtækið Tor þar sem rætt var um matvælaöryggi og rekjanleika afurða og heimsótti knattspyrnufélagið Hauka á Ásvöllum og fór í skoðunarferð um Ásvallalaug.

Baoding er 11 milljón manna borg í um 125 km fjarlægð frá Peking. Hafnarfjarðarbær og Baoding hafa átt í vinabæjarsamstarfi í rúma tvo áratugi. Vinabæjarsamstarfið hefur skipt miklu máli fyrir árangur jarðhitasamstarfs Íslendinga og Kínverja um að jarðhitavæða borgir og bæi í Kína en miklar jarðhitaauðlindir eru á stjórnsýslusvæði Baoding.