Fréttir




  • Vinabaer1

Vinabæjamót í undirbúningi

26. maí 2016

Þjóðfánum Íslands, Danmerkur, Eistlands, Finnlands, Noregs og Svíþjóðar var flaggað við Ráðhús Hafnarfjarðar í morgun en fulltrúar vinabæja Hafnarfjarðar eru staddir í Hafnarfirði þessa dagana vegna undirbúningsfundar vegna vinabæjarmóts 2017.

Vinabæjarmót eru að jafnaði haldin annað hvert ár og nú er komið að Hafnarfirði að vera gestgjafi en mótið var síðast haldið í Hafnarfirði árið 2005. Mótin samanstanda af uppákomum æskulýðs-, íþrótta og menningarhópa frá bæjunum auk ráðstefna og málþinga um hin ýmsu sameiginlegu málefni norrænu bæjanna. Vinabæjarkeðjan stuðlar einnig að heimsóknum skólahópa og þekkingarheimsókna á milli staðanna.

Norræna vinasambandið var stofnað árið 1947 en þá voru vinabæirnir aðeins tveir, Uppsalir í Svíþjóð og Friðriksberg í Danmörku. Árið 1949 bættust við Bærum í Noregi og Hämeenlinna í Finnlandi og tveimur árum síðar eða árið 1951 gerðist Hafnarfjarðarbær þátttakandi í norrænu vinabæjarkeðjunni. Nýjasti bærinn í keðjunni er síðan Tartu í Eistlandi sem bættist við árið 1991.