Fréttir



Fréttir

  • Vordur

Vígsla og afhending á verðlaunabekknum Vörður

3. okt. 2019

Nýr og fallegur bekkur hefur verið settur upp á Hleinum að Langeyrarmölum við bílastæði þar sem listaverk er staðsett. Bekkurinn er liður í verkefninu Brúkum bekki, samfélagsverkefni sem staðið hefur yfir frá árinu 2013 og telur í dag rúmlega 50 bekki. Hönnuður bekkjar eru þau Reynir Reynisson, Ásdís Ýr Einarsdóttir og Erla Rún Ingólfsdóttir. Skólameistari Tækniskólans, Hildur Ingvarsdóttir, afhenti bekkinn við formlega athöfn í vikunni.

Vinningstillaga í hugmyndasamkeppni hönnunardeildar

Forsaga bekkjar er að á fundi verkefnisstjórnar Brúkum bekki þá var samþykkt að leita til Iðnskólans í Hafnarfirði um að fá nemendur í hönnun til að koma með hugmynd að bekk. Vinningstillaga í hugmyndasamkeppni hönnunardeildar Iðnaskólans í Hafnarfirði, nú Tækniskólans, reyndist bekkurinn Vörður. Framleiðsla á frumgerð var unnin af nemendum skólans undir handleiðslu m.a. Hrafnkels Marinóssonar sem jafnframt hafði umsjón með verkefninu fyrir hönd skólans. Vonir standa til þess að hægt verði að setja upp bekkinn Vörður á nokkrum stöðum í Hafnarfirði í framtíðinni en Hleinar er fyrsti staðurinn. Hafa m.a. Trefjar og Karlar í skúrnum lýst yfir áhuga með þátttöku í verkefni.

Samfélagsverkefni sem blómstrar í bænum

Samfélagsverkefnið Brúkum bekki hefur átt mikilli velgengni að fagna í Hafnarfirði og er nú svo komið að Hafnfirðingar og vinir Hafnarfjarðar geta gengið um nær öll hverfi Hafnarfjarðar og hvílt sig á bekk með um 250-300 metra millibili. Um er að ræða sameiginlegt verkefni Öldungaráðs, Félags eldri borgara í Hafnarfirði, Félags sjúkraþjálfara og Hafnarfjarðarbæjar. Markmið með verkefninu er að stuðla að aukinni hreyfingu eldri borgara og gera þeim kleift að fara út að ganga í sínu nærumhverfi. Bekkirnir eru framleiddir hjá Málmsteypunni Hellu og eru merktir gefendum eða þeim aðila sem gefandi vill tileinka bekkinn. Málmsteypan Hella gefur að auki ellefta hvern bekk. Verkefnið er leitt af verkefnastjórn en hana skipa þau Gylfi Ingvarsson öldungaráði, Valgerður Sigurðardóttir hjá Félagi eldri borgara í Hafnarfirði, Haraldur Sæmundsson og Kristinn Magnússon hjá Félagi sjúkraþjálfara. 

HÉR er hægt að nálgast kort sem sýnir gönguleiðir og bekki í Hafnarfirði.