Fréttir



Fréttir

Vetrarhátíð er hafin í Hafnarfirði

1. feb. 2018

Vetrarhátíð verður haldin dagana 1. – 4. febrúar í 17. sinn og fer hátíðin fram í öllum sex sveitarfélögum höfuðborgarsvæðisins. Þessi hátíð ljóss og myrkurs samstendur af fjórum meginstoðum: Safnanótt, Sundlauganótt, Snjófögnuði og ljósalist ásamt yfir 150 ókeypis viðburðum þar sem fjöldi listamanna tekur þátt í að skapa einstaka stemningu í borginni.

Kynntu þér heildardagskrá Vetrarhátíðar á vetrarhatid.is

Á þriðja tug bygginga á höfuðborgarsvæðinu verða upplýstar í einkennislitum Vetrarhátíðar,  grænum og fjólubláum, auk þess sem ljóslistaverk verða á nokkrum lykilbyggingum á höfuðborgarsvæðinu; Hallgrímskirkju, Hörpu, Ráðhúsi Reykjavíkur, Kópavogskirkju og Hafnarborg þar sem gömlum draumi, videoverki eftir Ráðhildi Ingadóttir verður varpað á húsgafl svo gestir og fólk í nágrenni þess geti notið.

Í Hafnarfirði verða lykilbyggingar lýstar upp, Bókasafnið, Byggðasafnið og Hafnarborg á safnanótt, og Ásvallalaug á sundlauganótt. Aldrei hafa fleiri tekið þátt í þessu samspili ljóss og myrkurs.

 

SAFNANÓTT föstudaginn 2. febrúar

Safnanótt verður haldin föstudagskvöldið 2. febrúar 2018 en þá opna fimmtíu söfn dyr sínar og bjóða upp á skemmtilega og fjölbreytta dagskrá frá klukkan 18:00 til kl 23.00. Lögð verður áhersla á að bjóða upp á óhefðbundna viðburði þetta kvöld og veita gestum nýja sýn á söfnin. Íbúar og gestir borgarinnar á öllum aldri geta notið Safnanætur fram eftir kvöldi sér að kostnaðarlausu.

Kynntu þér dagskrá safnanætur í Hafnarfirði

Frítt er í sérstakan Safnanæturstrætó á milli allra safnanna.

Á Safnanótt fer fram Safnanæturleikur. Hægt er að taka þátt í leiknum með því að svara laufléttum spurningum og safna stimplum frá mismunandi söfnum sem þú heimsækir. Þátttökublað og spurningu leiksins er hægt að nálgast á öllum söfnum sem taka þátt í Safnanótt. Þátttökublaðinu er skilað í þar til gerða kassa á söfnunum og þú gætir unnið glæsilegan vinning. Dregið verður úr Safnanæturleiknum 15. febrúar.

 

SUNDLAUGANÓTT laugardaginn 3. febrúar

Sundlauganótt verður haldin laugardagskvöldið 3. febrúar 2018 en þá verður frítt í sund frá klukkan 18:00 til 22.00 í níu sundlaugum höfuðborgarsvæðisins. Uppákomur í laugunum verða af margvíslegum toga og munu gestir fá að upplifa einstaka og óvenjulega kvöldstund í mögnuðu myrkri. Ljós, myrkur og gleði verða allsráðandi, þar sem gestir eru hvattir til að taka þátt með því að dansa, syngja eða slaka á og njóta stundarinnar.

Kynntu þér dagskrá sundlauganætur í Ásvallalaug

 

SNJÓFÖGNUÐUR sunnudaginn 4. febrúar

Frítt er fyrir börn yngri en 16 ára á Snjófögnuð í Bláfjöllum.

 

Megintilgangur Vetrarhátíðar er að skemmta fólki á höfuðborgarsvæðinu og gefa því tækifæri til að njóta menningar, lista, íþrótta og útiveru í eigin sveitarfélagi og/eða heimsækja nágranna sína í nærliggjandi sveitarfélagi. Orkusalan er aðalbakhjarl Vetrarhátíðar í ár og hátíðin unnin í samstarfi við Hljóð X.