Fréttir




  • Fjoluhlid-Steinahlid-opinn-leikvollur-1-sept.-2020

Vegferð viðhalds og endurnýjunar heldur áfram

16. sep. 2020

Endurbætur á opnum leikvelli í Mosahlíð voru að klárast í vikunni þar sem sett var nýtt fallvarnarlag og gervigras, nýtt gormatæki og þökulagt í kringum svæðið. Á næstu dögum taka við endurbætur á opnu leiksvæði í Blikaási og er ráðgert að endurbótum þar ljúki í síðasta lagi í næstu viku. Vegferð sveitarfélagsins við viðhald og endurnýjun opinna leiksvæða heldur áfram.

Rík áhersla hefur verið lögð á viðhald og endurnýjun leikvalla og leiksvæða í Hafnarfirði. Starfsfólk umhverfis- og skipulagssviðs hefur síðustu daga, vikur, mánuði og ár unnið að viðhaldi og endurnýjun leikvalla og leiksvæða í Hafnarfirði og hefur hópurinn fikrað sig jafn og þétt í gegnum hverfi bæjarins. Vellirnir eru teknir út fyrir framkvæmdir, skipt út undirlagi á einhverjum völlum og sett gervigras og gúmmíhellur í staðinn til að auka öryggi, notagildi og líftíma vallanna. Í upphafi sumars var unnið að endurbótum á opnum leikvöllum innst i Teigabyggð, Álfholti og Stekkjarhvammi. Á þessum völlum var hellulögn löguð, ný net sett í fótboltamörkin, fallvarnarlagi skipt út fyrir malarundirlag, þökulagt og nýjum tækjum komið upp á einhverjum stöðum, allt eftir því sem við á. 

Í bænum okkar eru fjölmargir leik- og sparkvellir sem við hvetjum íbúa og vini Hafnarfjarðar til að kynna sér. Heyrst hefur að sumar hafnfirskar fjölskyldur séu að vinna sig jafnt og þétt í gegnum alla leikvelli og leiksvæði Fjarðarins til að upplifa ný svæði og fjölbreytnina. Það er góð og heilsueflandi hugmynd!