Fréttir




  • UthlutunStyrkja

Úthlutun íþróttastyrkja Rio Tinto og Hafnarfjarðarbæjar

5. jún. 2019

Aðilarfélög ÍBH fengu í  gær 11 milljóna króna úthlutun Rio Tinto og Hafnarfjarðarbæjar til íþróttastarfs fyrir yngri en 18 ára. Upphæð úthlutunar til hvers félags stýrist annarsvegar af jafnréttishvata og hinsvegar af þeim iðkendafjölda sem æfir reglulega í félögunum.  Jafnréttishvataverðlaun 2019 hlutu Brettafélag Hafnarfjarðar fyrir mestu prósentufjölgun stúlkna og Fimleikafélagið Björk fyrir mestu iðkendafjölgun stráka. 

Úthlutun styrkja frá 2001

Úthlutun íþróttastyrkja fyrir yngri en 18 ára iðkendur aðildarfélaga ÍBH fór fram þriðjudaginn 4. júní sl. samkvæmt samningi milli Íþróttabandalagsins í Hafnarfirði (ÍBH), Rio Tinto og Hafnarfjarðarbæjar. Athöfn fór fram í höfuðstöðvum Rio Tinto á Íslandi í Straumsvík þar sem fulltrúar félaganna tóku á móti styrkjunum. Samningur á milli Íþróttabandalagsins í Hafnarfirði, Rio Tinto og Hafnarfjarðarbæjar um úthlutun íþróttastyrkja hefur verið í gildi frá árinu 2001. Samningar hafa verið gerðir til þriggja ára í senn og er nýjasti samningurinn frá árinu 2017 og lýkur honum í árslok 2019. Rio Tinto og Hafnarfjarðarbær greiða 10 milljónir á ári hvor aðili inn í samstarfið til stuðnings íþróttum barna og unglinga í Hafnarfirði. Í dag er verið að úthluta fyrri úthlutun ársins úr sjóðnum eða 60% vegna iðkendafjölda sem æfir reglulega í félögunum og jafnréttishvata, samtals 12 milljónir. Óskað var eftir umsóknum frá aðildarfélögum ÍBH í aprílmánuði og sóttu 12 félög um stuðning úr sjóðnum. 

Eftirtalin félög fengu stuðning út frá samningi og umsóknum:

  • Fimleikafélag Hafnarfjarðar kr. 3.200.396.
  • Fimleikafélagið Björk kr. 2.347.683.
  • Knattspyrnufélagið Haukar kr. 1.934.026.
  • Brettafélag Hafnarfjarðar kr. 772.885.
  • Sundfélag Hafnarfjarðar kr. 761.999.
  • Badmintonfélag Hafnarfjarðar kr. 553.356.
  • Hestamannafélagið Sörli kr. 404.585.
  • Dansíþróttafélag Hafnarfjarðar kr. 368.300.
  • Golfklúbburinn Keilir kr. 302.985.
  • Siglingaklúbburinn Þytur kr. 232.228.
  • Íþróttafélagið Fjörður kr. 76.200.
  • Hnefaleikafélag Hafnarfjarðar kr. 45.357.

Jafnréttishvataverðlaun 2019 hlutu Brettafélag Hafnarfjarðar kr. 500.000 fyrir mestu prósentufjölgun þess kyns sem hallaði á (stúlkur) og Fimleikafélagið Björk kr. 500.000 fyrir mestu iðkendafjölgun þess kyns sem hallaði á (strákar).

Við óskum aðildarfélögum innilega til hamingju!