Fréttir




  • IMG_2757

Upplifum leikinn á Thorsplani

30. jún. 2016

ÁFRAM ÍSLAND!

Stórleikur Íslands og Frakklands í átta liða úrslitum Evrópumótsins verður sýndur á stórum skjá á Thorsplani á sunnudaginn. Hafnfirðingar og aðrir nærsveitungar eru hvattir til að mæta á EM-heimavöll Hafnarfjarðar til að hvetja okkar menn áfram og umfram allt gleðjast.

Leikurinn hefst stundvíslega kl. 19 og eru gestir hvattir til að mæta tímanlega, koma sér vel fyrir á Thorsplani og njóta. Það er engin önnur en Bryndís Ásmundsdóttir, söng- og leikkona okkar Hafnfirðinga, sem mun heiðra áhorfendur leiks með nærveru sinni og stýra hvatningu og söng í hléi á viðeigandi tímum á meðan á leik stendur. Búast má við mikilli stemningu á torginu en hvert torgið af fætur öðru hefur bæst við innan sveitarfélaga landsins í takt við velgengni og árangur íslenska landsliðsins. Þjóðin öll hefur síðustu vikur sameinast í gegnum fótboltann, hrifist með og fagnað árangri íslenska liðsins á EM enda um að ræða einstakan viðburð í íslenskri íþróttasögu. Með þessu vilja aðstandendur sýningar á Thorsplani færa fótboltann nær Hafnfirðingum og öðrum gestum og gangandi og gera þeim kleift að labba á „völlinn“, upplifa og njóta.

Sérstakar þakkir fá ISS, Landsbankinn, Trefjar, Hlaðbær-Colas , Fjarðarkaup og Íslenska kaffistofan fyrir að standa að EM-samáhorfinu á Thorsplani í samvinnu við Markaðsstofu Hafnarfjarðar og Hafnarfjarðarbæ. HljóðX sér um uppsetningu á skjánum og tæknilega hlið framkvæmdar.

Sjáumst í bláu á vellinum!

Hvetjum fólk eindregið til að ganga eða hjóla í bæinn og vekjum athygli á því að Strandgata er lokuð frá kl. 18:15 - 21:15.