Fréttir



  • Screenshot_20210727-101748_Instagram

Ung og sexí – Skapandi Sumarstörf

Skapandi sumarstörf

27. júl. 2021

Félagarnir Kolbeinn Sveinsson og Einar Baldvin Brimar Þórðarson hafa í sumar, á vegum Skapandi Sumarstarfa, unnið við skrif að Íslenskum söngleik um ungt fólk sem mun bera nafnið Ung og sexí. Nafn söngleiksins kemur frá laginu Ung og sexí, eftir hljómsveitina Kef LAVÍK.

Hugmyndin að söngleiknum hefur fengið að malla í rúm tvö ár

Hugmyndin að söngleiknum kom fyrir rúmum tveimur árum síðan, þegar þeir voru námsmenn við Flensborgarskólann en síðan þá hefur hugmyndin þróast og er nú hægt og rólega að verða að veruleika. Eins og er vinna þeir hörðum höndum að því að fínpússa verkið. Fyrsta og annað uppkast að söngleiknum er komið í hús og þeir eru hálfnaðir með þriðja uppkastið.

Söngleikurinn Ung og sexí er í grófum dráttum Jukebox söngleikur fullri lengd en það eru söngleikir þar sem tónlistin samanstendur af þekktum lögum, í stað frumsamdra. Tónlistin verður í brennidepli í leiksýningunni og mun innihalda íslensk hip hop- og popp lög frá síðustu fimmtán árum. Meðal þeirra má nefna; Hún er alveg með‘etta (Friðrik Dór), Stjörnuhröp ( Gabríel, Opee, Valdimar Guðmundsson), Hjartað tók kipp (Raven), Út í geim (Birnir), Það birtir alltaf til (Kristmundur Axel) og Rólegur Kúreki (Bríet) að því gefnu að þeir fái leyfi höfunda að nota lögin í sýningunni.

Einar Baldvin situr að skrifum á Pallett

Skapandi skrif í beinni

Áhugasamir geta fylgst með þessum sískrifandi höfundum í beinni á kaffihúsinu Pallett í Hafnarfirði á milli kl 10 og 14 alla mánudaga og miðvikudaga út júlí. Þar bjóða þeir fólki að setjast með sér í hversdagslegt spjall sem oftar en ekki endar á því að einhver ný hugmynd læðist inn í verkið. Hægt er að fylgjast með daglegum verkefnum og uppátækjum þeirra Kolbeins og Einars Baldvins í gegnum Instagram síðu þeirra.