Fréttir




  • HamranesOkt2019

Tólf umsóknir um fjórar lóðir

24. okt. 2019

Mikill áhugi á fjölbýlishúsalóðum í Hamranesi

Hafnarfjarðarbær óskaði nýlega eftir áhugasömum þróunaraðilum á lóðum í fyrsta áfanga Hamraness, 25 hektara svæðis sunnan við Ásvallabraut, Velli 6 og Skarðshlíð í Hafnarfirði. Alls bárust 12 umsóknir um þær fjórar lóðir sem í boði eru og því líklegt að mikil eftirspurn verði eftir lóðir á þessu nýja svæði þegar lóðir í næstu áföngum uppbyggingar verða auglýstar lausar til umsóknar. Umsækjendur óska eftir 1-3 lóðum í umsóknum sínum.

Skipulagsvinna á Hamranesi, nýju landsvæði í Hafnarfirði undir íbúðahús, er farin af stað. Uppbygging á Hamranessvæði mun skiptast í þrjá áfanga og telja í heild um 540 íbúðir. Ákveðið hefur verið að úthluta fjórum lóðum af ellefu í fyrsta áfanga uppbyggingar á svæðinu til þróunaraðila (reitir 1-4 á mynd)  og skapa þannig grundvöll fyrir fjölbreyttar og nýjar hugmyndir að búsetuformi, uppbyggingu og eðli. Fjórum lóðum í fyrsta áfanga verður, sem fyrr segir, úthlutað til þróunaraðila. Þrjár lóðir, sem hugsaðar eru sem hefðbundnar fjölbýlishúsalóðir, eru í deiliskipulagsvinnu og er þar gert ráð fyrir a.m.k. 170 íbúðum (reitir , 10 og 11). Þær þrjár lóðir sem eftir standa í fyrsta áfanga eru ætlaðar íbúðafélaginu Bjargi og er deiliskipulagsvinna þar einnig komin af stað (reitir 7, 8 og 9). Þar er gert ráð fyrir uppbyggingu 150 íbúða. Á svæði sem ætlað er þróunaraðilum er í heild gert ráð fyrir 217 íbúðum, byggðir fermetrar verða 27.088 á alls 14.741 m² landsvæði.

HamranesSvaedi

,,Þessi mikli áhugi á lóðum í Hamranesi er mjög ánægjulegur,“ segir Rósa Guðbjartsdóttir bæjarstjóri, ,,...og áttum við reyndar von á góðum viðbrögðum því eftirspurnin hefur verið mikil eftir lóðum undir fjölbýlishús í Hafnarfirði. Hamraneshverfi mun liggja við hlið Skarðshlíðarhverfis og saman munu þessi tvö hverfi mynda fallegt vistvænt úthverfi sem býr svo vel að hafa uppland Hafnarfjarðar í bakgarðinum. Lóðasala í Skarðshlíð hefur gengið nokkuð vel og hverfið farið að taka á sig mynd. Frumbyggjar fluttu í hverfið í sumar, rekstur leik- og grunnskóla í Skarðshlíð er kominn á fullt og uppbygging á fjölbýlishúsum og sérbýlum í fullum gangi þessa dagana“ segir Rósa. Gert er ráð fyrir að niðurstaða umsókna um þróunarlóðir liggi fyrir í lok nóvember. Þá verði búið að meta gæði og umfang allra umsókna og taka afstöðu til þess hvort landsvæði undir þróunarbyggð verði stækkað.