Fréttir



Fréttir

Þjónustan verði í fremstu röð til framtíðar litið

1. sep. 2019

Þjónusta verði í fremstu röð - úrlausn í fyrstu snertingu er markmiðið

Með nýju sviði þjónustu- og þróunar sem tekur formlega til starfa 1. september er tekið skref í þá átt að geta leyst sem flest erindi er berast bænum í fyrstu snertingu í þjónustuveri eða með stafrænum þjónustuleiðum. Hið nýja svið tekur við ábyrgð á þjónustuveri bæjarins, tölvudeild og samskiptamálum. Að auki færast menningar- og ferðamál ásamt tengdum stofnunum til hins nýja sviðs.

Breytingarnar voru samþykktar í bæjarráði og bæjarstjórn í vor og byggja þær á umfangsmikilli greiningarvinnu á þjónustu bæjarins. Í þeirri vinnu var lögð áhersla á að fá fram sem flest sjónarmið, jafnt innan stjórnkerfisins sem bæjarbúa. Opnuð var sérstök ábendingagátt þar sem íbúar gátu sent ábendingar um það sem betur mætti fara og haldinn var íbúafundur þar sem rætt var um þjónustuveitingar Hafnarfjarðarbæjar. „Þessi vinna leiddi í ljós að margt mætti betur fara í þjónustuveitingu ekki síst vegna þess að innviðir og verkferlar hafa ekki breyst í takt við breyttar þarfir og breytt umhverfi. Við erum með þessum breytingum að taka mikilvægt skref til að nútímavæða og bæta þjónustu bæjarins enda viljum við að hún sé í fremstu röð,“ segir Rósa Guðbjartsdóttir bæjarstjóri. Nýtt svið þjónustu og þróunar mun á næstu vikum og mánuðum forgangsraða verkefnum og aðgerðum og vinna að innleiðingu verkefna sem eru til þess fallin að stytta boðleiðir, hraða afgreiðslu og bæta þjónustu sveitarfélagsins. Sviðsstjóri hins nýja sviðs þjónustu og þróunar er Sigurjón Ólafsson. 

Samhliða ofangreindum breytingum er heitum fagsviða stjórnsýslu breytt til að endurspegla betur verkefni þeirra og viðfangsefni:

  • Fjölskylduþjónusta fær heitið fjölskyldu-og barnamálasvið
  • Fræðslu-og frístundaþjónusta fær heitið mennta-og lýðheilsusvið
  • Umhverfis-og skipulagsþjónustu fær heitið umhverfis-og skipulagssvið