Fréttir



  • RosaAdventukvedja2021

Þakklæti á jólum - jólahugvekja bæjarstjóra 2021

23. des. 2021

Þakklæti á jólum - jólahugvekja bæjarstjóra 2021

Nú þegar jólahátíðin er að ganga í garð með allri sinni dýrð tökumst við enn og aftur á við krefjandi áskoranir vegna heimsfaraldurs, bæði sem einstaklingar og samfélag. Jólin verða hjá mörgum með öðru sniði en gert hafði verið ráð fyrir og skulum við reyna að hugsa til þess að senn sjái fyrir endann á faraldrinum.

Birtan veitir von

Nú er daginn tekið að lengja á ný og brátt mun birtan verða ríkjandi. Fyrir það getum við verið þakklát. Jafnframt er gott að staldra við og þakka fyrir það sem við höfum. Þakka fyrir heilsuna, fjölskylduna, vinina og hvað það er sem lýsir upp tilveru okkar. Þakka fyrir alla litlu hlutina, hlýja samveru eða einföldu stundirnar sem færa okkur sanna gleði og ekki fást metnar til fjár. Á sama tíma og hugur okkar er hjá þeim sem eiga í erfiðleikum, eru veikir, sakna náinna ástvina eða finnst jólahátíðin erfiður tími af öðrum ástæðum.

Besta gjöfin

Með því að sýna samhug og gefa af okkur leggjum við okkar af mörkum til að bæta líf okkar sjálfra og náungans. Það er góð tilfinning að finna að maður hafi gert gagn eða getað glatt einhvern í amstri hversdagsins. Jafnvel eitt lítið bros, einlægt og verðskuldað hrós eða falleg orð eru gjafir sem flestir þiggja með þökkum; gjafir sem allir geta veitt.

Jólaljósin lýsa upp tilveruna

Hér í Hafnarfirði höfum við á aðventunni lagt áherslu á falleg jólaljósin sem aldrei fyrr. Við höfum aukið möguleika til afþreyingar með ævintýralandi í Hellisgerði og skautasvelli í miðbænum. Viðtökurnar hafa sannfært okkur um og sýnt hve einfaldleikinn er oft bestur. Að geta rölt um í aðdraganda jóla og upplifað ljúfa stemningu sem af ljósunum hlýst veitir mörgum gleði og ánægju. Samhliða aukinni umferð fólks eykst ásókn í kaffi- og veitingahús, verslanir og menningarhúsin. Blómlegt mannlíf í miðbænum styrkir bæinn allan og gerir hann einstakan.

Nýtt ár og ný tækifæri

Við áramót ríkir jafnan eftirvænting og við hugleiðum hvað nýja árið muni bera í skauti sér. Einnig lítum við til baka og gerum upp árið sem er að líða. Full auðmýktar vil ég þakka fyrir samstarf og samveru á árinu sem er að líða, sérstaklega starfsfólki Hafnarfjarðarbæjar sem hefur lagt mikið á sig til að halda þjónustu og starfsemi bæjarins gangandi við óvenjulegar aðstæður. Með jákvæðni og bjartsýni í farteskinu eru okkur allir vegir færir. Ég óska ykkur öllum gleðilegra jóla og farsældar á nýju ári.

Rósa Guðbjartsdóttir
bæjarstjóri