Fréttir




  • HFJ_AMMA_HOFI-1

Verkefni sem örva félagsstarf og heilsueflingu fullorðinna

17. maí 2021

Heimaþjálfun, námskeið í notkun snjalltækja og hvatning og fylgd í félagsstarfi

Hafnarfjarðarbær fékk á dögunum 5.640.000.- kr. styrk frá félagsmálaráðuneyti í átaksverkefni yfirvalda sem miðar að því að örva félagsstarf og heilsueflingu fullorðinna. Verður styrkurinn nýttur til að auka og efla félagsstarf og stuðningsþjónustu við eldri borgara í Hafnarfirði umfram hefðbundið félagsstarf og þjónustu. Lögð er áhersla á framkvæmd þriggja verkefna sumarið 2021 sem miða m.a. að því að ná til þeirra hópa sem eru félagslega einangraðir, hreyfa sig lítið, hafa ekki alist upp við rafræna þjónustu og eiga erfitt með að tileinka sér nýja tækni.

Námskeið í notkun snjalltækja
Margir eldri borgarar eru óöruggir í notkun snjalltækja og þar með í rafrænum samskiptum og umsóknum við m.a. opinberar stofnanir, Heilsuveru, viðskiptabanka og fleiri. Kunnátta á snjalltæki auðveldar einnig eldri borgurum að vera í samskiptum við aðstandendur og ástvini og opnar á tækifæri m.a. til verslunar á netinu, fræðslu og fróðleiks. Boðið verður uppá þrjú tveggja vikna námskeið í notkun snjalltækja á tímabilinu 1. júní til 9. júlí 2021. Skráning er í síma 555-0142 og í Hraunseli að Flatahrauni 3 sem jafnframt er kennslustaðurinn. 

  • 01.06. - 11.06.2021
  • 14.06. - 25.06.2021
  • 28.06. - 09.07.2021

Heimahreyfing
Margir veikburða eldri borgarar fara lítið út af sínum heimilum, eru bæði félagslega einangraðir og hreyfa sig lítið. Í gegnum þetta sumarverkefni Hafnarfjarðarbæjar verður boðið upp á aðlagaða aðstoð starfsmanns við hreyfingu á heimili viðkomandi, t.d. stólaleikfimi. Æfingarnar eru aðlagaðar að getu og færni hvers og eins og hafa þann undirliggjandi tilgang að styrkja einstaklingana og efla lífsgæði þeirra og getu og færni.

Hvatning og fylgd í félagsstarfið
Þónokkrir fullorðnir einstaklingar, sem náð hafa vissum aldri, mikla það fyrir sér að sækja það öfluga og áhugaverða félagsstarf sem í boði er innan sveitarfélagsins. Félagsstarf eldri borgara er rekið í Hraunseli Flatahrauni 3 og er starfsemin afar fjölbreytt; billjard, listmálun, handavinna, bingó, pílukast og spjall svo fátt eitt sé nefnt. Áhersla er lögð á að ná til þeirra sem vantar hvatningu til að koma sér af stað og fylgd í félagsstarfið.

Samstarfsaðilar að þessum sumarverkefnunum eru félagsstarf eldri borgara Hraunseli, Félag eldri borgara Hafnarfirði, ráðgjafar í málefnum eldri borgara og Hafnarfjarðarbær.

Nánari upplýsingar veita:

  • Sjöfn Guðmundsdóttir, deildarstjóri stuðnings- og stoðþjónustu Hafnarfjarðarbæjar, vegna heimahreyfingar og hvatningar og fylgdar í félagsstarfið. Netfang: sjofng@hafnarfjordur.is
  • Linda Hildur Leifsdóttir, verkefnastjóri félagsstarfs eldri borgara í Hraunseli, vegna námskeiða í notkun snjalltækja. Netfang: lindah@hafnarfjordur.is