Fréttir



Fréttir

  • IMG_8034

Sumarsöngur og leikskólalist

19. apr. 2017

Rúmlega 400 nemendur í 3. bekkjum grunnskóla Hafnarfjarðar gerðu heiðarlega tilraun til að syngja inn sumarið í morgunsárið nú á síðasta vetrardegi. Samhliða voru Bjartir dagar í Hafnarfirði settir formlega en menningarhátíðin og jafnframt fyrsta bæjarhátíð sumarsins stendur yfir þar til á sunnudag. Sérstök áhersla er lögð á þátttöku barna og unglinga í Björtum dögum og er Sumardagurinn fyrsti stór hluti af hátíðarhöldunum.

Hópur nemenda úr 3. bekkjum grunnskóla Hafnarfjarðar sungu burtu veturinn og fögnuðu komu sumarins á Thorsplani í Hafnarfirði í morgun. Þessi venja hefur verið viðhöfð um árabil og hafa skrautlegar húfur og höfuðföt fylgt bekkjunum á milli ára.  Heiðar Örn Kristinsson, pollapönkari, stýrði söng og dansi og sungu börnin meðal annars um vorið, hýra Hafnarfjörð og þar hvernig hrekja megi í burtu fordóma. Síðustu daga hafa leikskólabörn í Hafnarfirði farið í fyrirtæki, verslanir og stofnanir í Hafnarfirði og skreytt með list sinni. Þannig hefur t.d. Fjörður Verslunarmiðstöð verið skreytt með list frá leikskólanum Arnarbergi, Icelandair á Flugvöllum með list frá Bjarkalundi og Sólvangur hjúkrunarheimili með leikskólalist frá Hörðuvöllum.

Báðir viðburðirnir eru hluti af Björtum dögum sem standa yfir dagana 19. – 23. apríl. Menningarhátíð þar sem stofnanir bæjarins, félagasamtök, fyrirtæki og einstaklingar standa fyrir fjölbreyttum viðburðum. 

Dagskrá Bjarta daga má finna HÉR