Fréttir



Fréttir

Sumargöngur - Neisti listarinnar

6. júl. 2015

Í sumar er boðið uppá kvöldgöngur í Hafnarfirði með leiðsögn alla fimmtudaga kl. 20. Miðað er við að þær taki um klukkustund og séu við allra hæfi. Þátttaka er ókeypis.

Fimmtudaginn 9. júlí kl. 20 verður gengið  um slóðir myndlistarkonunnar Hönnu Davíðsson sem hóf búskap sinn í Sivertsenshúsi árið 1912. Húsið, sem telst vera elsta hús bæjarins, er nú hluti af Byggðasafni Hafnarfjarðar. Sagt verður frá þeim stöðum sem veittu Hönnu innblástur í myndlistinni og lýkur göngunni með heimsókn í Fríkirkjuna í Hafnarfirði en verk Hönnu skipa sérstakan sess í kirkjunni.

Gengið verður frá  Pakkhúsi Byggðasafns Hafnarfjarðar á Vesturgötu 6.

Ólöf K. Sigurðardóttir forstöðumaður Hafnarborgar leiðir gönguna ásamt Huldu Cathincu Guðmundsdóttur dótturdóttur Hönnu. Ólöf vann að sýningu á verkum Hönnu sem sett var upp í Hafnarborg í byrjun árs og vakti athygli á verkum þessarar einlægur og listakonu sem starfaði í Hafnarfirði allt sitt líf.

Sumargöngurnar eru samstarf Hafnarborgar, Byggðarsafns, Bókasafns og skrifstofu menningarmála í Hafnarfirði. Göngurnar njóta stuðnings frá Hafnarfjarðarhöfn.

Dagskrá:

9. júlí - Neisti listarinnar – Slóðir listakonunnar Hönnu Davíðsson. Gengið frá Pakkhúsi Byggðasafnsins.

16. júlí - Rölt um listaslóðir – Ragnheiður Gestsdóttir rithöfundur. Gengið frá Bókasafni.

23. júlí - Víðistaðatún – Þráinn Hauksson landslagsarkitekt. Gengið frá Skátaheimilinu við Hjallabraut.

30.júlí - Hugað að náunganum – Gengið um slóðir sem endurspegla þátttöku kvenna í uppbyggingu umönnunar og heilsugæslu í Hafnarfirði. Gengið frá Pakkhúsi Byggðasafnsins.

6. ágúst - Verslunarsaga kvenna – Lúðvík Geirsson fyrrverandi  bæjarstjóri Hafnarfjarðar. Gengið frá Hafnarborg.

13. ágúst - Loksins klukknahljómur – Björn Pétursson Bæjarmynjavörður Hafnarfjarðar fjallar um kirkjusögu bæjarins. Gengið frá Pakkhúsi Byggðasafnsins

20. ágúst - Ásgeir Stefánsson og framlag hans til íslenskrar byggingarlistar – Pétur H. Ármannsson arkitekt. Gengið frá Hafnarborg.

27. ágúst - Vettvangur æskunna – Árni Guðmundsson. Félagsuppeldisfræðingur, "leiðir göngu um slóðir unglingamenningar“ Gengið frá Pakkhúsi Byggðasafnsins.