Fréttir




  • Blafjoll

Stórátak við uppbyggingu skíðasvæða höfuðborgarsvæðisins

7. maí 2018

Í dag skrifuðu borgarstjórinn í Reykjavík og bæjarstjórar Mosfellsbæjar, Seltjarnarness, Kópavogs, Garðabæjar og Hafnarfjarðar undir tímamótasamkomulag sveitarfélaganna um stórátak við endurnýjun og uppbyggingu mannvirkja skíðasvæða höfuðborgarsvæðisins í Bláfjöllum og Skálafelli.

Undirritunin fór fram í þjónustumiðstöðinni í Bláfjöllum núna í hádeginu í blíðskapar slyddu.

Samkomulagið felur í sér að á næstu árum verður ráðist í endurnýjun og uppsetningu þriggja stólalyfta í Bláfjöllum og endurnýjun stólalyftu í Skálafelli. Ennfremur verður settur upp búnaður til snjóframleiðslu í Bláfjöllum.

Samhliða þessum verkefnum verður unnið að áframhaldandi uppbyggingu á skíðgöngusvæði og bættum aðstæðum fyrir skíðagöngufólk.

Áætlaður kostnaður vegna þessara framkvæmda á árunum 2019 – 2024 er um 3,6 milljarðar króna.

Þessi verkefni eru fyrri áfangi af tveimur við heildaruppbyggingu skíðasvæðanna sem byggja á tillögu að framtíðarsýn um uppbyggingu og rekstur þeirra til ársins 2030.

Með samkomulagi þessu verður rofin sú kyrrstaða sem verið hefur á uppbyggingu skíðasvæða höfuðborgarsvæðisins um nokkurt skeið, og það markar því tímamót í uppbyggingu og rekstri skíðasvæða höfuðborgarsvæðisins.