Fréttir




  • StodumatNemendurErlendurUppruni

Stöðumat fyrir nýja nemendur af erlendum uppruna

25. feb. 2019

Sveitarfélögin Árborg, Hafnarfjörður og Reykjanesbær í samstarfi við Menntamálastofnun hafa unnið að þýðingu og staðfæringu á sænsku stöðumatstæki fyrir nýja nemendur af erlendum uppruna sem hefur verið notað með góðum árangri í Svíþjóð. Lagt er m.a. mat á fyrri þekkingu og reynslu sem og læsi og talnaskilning. Meginmarkmið stöðumats er að styðja skólana í að staðsetja nemendur hvað varðar þekkingu og reynslu og auðvelda þar með kennurum og skólastjórnendum að skipuleggja nám hvers nemanda út frá styrkleikum og þörfum.

Innleiðing á stöðumati er hafin í fjórum grunnskólum

Í síðustu viku var haldið námskeið í Garðabæ fyrir fjóra grunnskóla sem hafa tekið að sér að hefja innleiðingu á stöðumatinu. Þetta matstæki var hannað af þremur háskólum í Svíþjóð og Skolverket í kjölfar viðamikillar rannsóknar. Þeir skólar sem ríða á vaðið eru Háaleitisskóli í Reykjanesbæ, Lækjarskóli í Hafnarfirði, Vallaskóli á Selfossi og Fellaskóli í Breiðholti. Fleiri tóku þátt í námskeiðinu, m.a. ráðgjafar frá Miðju máls og læsis í Reykjavík og fulltrúar frá Mennta- og menningarmálaráðuneytinu. Þær Þórdís H. Ólafsdóttir og Annelie Hultgren, sem hafa mikla reynslu af kennslu fjöltyngdra barna í Rosengårdskolan í Malmö, kynntu og kenndu á stöðumatstækið og fjölluðu um kennslu í fjöltyngdum bekk. Þátttakendur létu vel af námskeiðinu og munu í kjölfarið leggja stöðumatið fyrir í sínum skólum. Þegar reynsla er komin á notkun þess og prófarkalestri lokið verða haldin fleiri námskeið og öllum skólum á landinu gefið tækifæri til að nýta hið nýja matstæki sem hefur tilfinnanlega vantað hér á landi. 

Stýrihópur hefur verið starfandi í tvö ár en hann skipa Aneta Figlarska kennsluráðgjafi í Árborg, Fanney Dóróthe Halldórsdóttir sviðsstjóri fræðslu- og frístundaþjónustu Hafnarfjarðarbæjar, Halldóra Fríða Þorvaldsdóttir kennsluráðgjafi hjá fræðslusviði Reykjanesbæjar, Helgi Arnarson sviðsstjóri fræðslusviðs Reykjanesbæjar, Hrund Harðardóttir kennsluráðgjafi í Árborg, Kolfinna Njálsdóttir deildarstjóri skólaþjónustu Reykjanesbæjar, Kristrún Sigurjónsdóttir kennsluráðgjafi í Hafnarfirði, Þórdís Helga Ólafsdóttir sérkennslufulltrúi grunnskóla í Hafnarfirði og Þorsteinn Hjartarson, fræðslustjóri hjá Sveitarfélaginu Árborg.