Fréttir




  • SkardshlidHfj1Hopurinn

Stilla saman strengi í Skarðshlíð

10. sep. 2020

Skapandi og fjölbreytt samstarf leikskóla, grunnskóla og tónlistarskóla í nýju íbúðahverfi

Í haust eru tvö ár liðin síðan fyrsti áfangi Skarðshlíðarskóla var afhentur Hafnarfjarðarbæ og kennsla gat hafist grunnskólanum. Í ágúst í fyrra opnaði Skarðshlíðarleikskóli í sömu byggingu og í vetur bætist við útibú Tónlistarskóla Hafnarfjarðar og glæsilegt íþróttahús. Nú þegar er komin góð reynsla af samstarfinu á leik- og grunnskólastigi og mikil tilhlökkun ríkir með tækifærin sem fylgja því að bæta tónmenntakennslu í flóruna. 

Bæjarblaðið Hafnfirðingur hitti Ingibjörgu Magnúsdóttur grunnskólastjóra, Berglindi Kristjánsdóttur leikskólastjóra og Eirík Stephensen tónlistarskólastjóra, sem eru m.a. sammála um að einstakt umhverfi skólans í Skarðshlíð hafi mikið að segja fyrir skólastarfið.

SkardshlidHfj2Frá sameiginlegu skólastarfi í Skarðshlíð. Mynd/aðsend 

„Samstarf grunnskólans og leikskólans undanfarið ár hefur verið mjög gott. Við höfum m.a. lagt upp með alls kyns samveru leikskólanemenda úr tveimur elstu árgöngum og grunnskólanemenda á yngsta stigi, í Lífshlaupinu, jólaleikriti og söngstundum. Það var t.d. svo gaman að fá Eirík og Stefán Ómar Jakobsson á sal hjá okkur í fyrra til að syngja með okkur og spila undir,“ segir Ingibjörg og Berglind bætir við: „Þau voru ekkert smá spennt, bara eins og að Justin Bieber væri að koma. Eiríkur: „Svo komum við bara, tveir miðalda karlar sem minntu frekar á Gylfa Ægis og Árna Johnsen.“ Þau skellihlæja og það er greinilegt að andinn er léttur meðal þessa þríeykis og mikill vilji til að gera eitthvað skapandi saman í vetur. Þau eigi eftir að hittast oftar og móta það betur.

SkardshlidHfj3Stefán Ómar og Eiríkur á góði söngstund í skólanum. Mynd/aðsend

Unglingar kynnast starfi leikskólakennara í valáfanga

Ingibjörg nefnir í því samhengi að síðastliðið ár hafi verið boðið upp á valáfanga í unglingadeild þar sem nemendum gátu spreytt sig á verkefnum í daglegu starfi leikskólakennara. Um sé að ræða tvö valtímabil yfir veturinn. „Það gekk mjög vel. Fjórir nemendur komu tvisvar í viku í klukkutíma í inniveru eða útiveru með leikskólabörnunum. Þar urðu til fallegar tengingar, ungu börnin voru síður smeyk við unglingana, sem á móti fundu til ábyrgðartilfinningar og stolts.“ Berglind tekur fram að eðli málsins samkvæmt taki ungmennin ekki á hegðunarvanda eða sjái um bleyjuskipti og slíkt, heldur eigi fyrst og fremst samskipti við börnin í leik og starfi og fái svo umsögn. „Það er gott að hafa flæði á milli þessara starfsstöðva og við starfsfólkið á báðum stigum höfum verið mjög samtaka. Að sjálfsögðu auðveldar það 6 ára börnum að byrja sitt skólastarf eftir að hafa kynnst svæðinu, byggingunni og jafnvel starfsfólki grunnskólans áður,“ segir Ingibjörg.

SkardshlidHfj4Ingibjörg, Berglind og Eiríkur í einu af kennsluherbergjum TH í Skarðshlíð. Mynd/OBÞ

Ánægja meðal starfsfólks og foreldra barna

Berglind segir margt hafa áorkast í samstarfinu undanfarið ár, þrátt fyrir tilkomu COVID19. „Hér ríkir sameiginleg sýn stjórnenda á hvernig hægt er að samþætta mannauðinn til að byggja upp öflugt skólastarf sem er og verður í stöðugri þróun og nemendum okkar til heilla. Það er svo margt hægt að gera og orkan og viljinn í starfsfólkinu hér eru alveg mögnuð. Margir starfsmenn eru ánægðir með að mega og geta haft áhrif á skólastarfið og skipar bókasafnið hér þar mikilvægan sess. Þegar ég hef útskýrt fyrir foreldrum skipulagið hérna með flæðinu á milli skólastiga hef ég einnig fundið hvað þeim finnst það jákvætt.“ Ingibjörg tekur undir þetta og bætir við: „Við höfum líka verið mjög heppin með það að fólk sem hefur sótt um starf hér, hefur gert það vegna þess að það er hrifið af hugmyndafræðinni sem ríkir hér og því hvernig skólasamfélagið virkar. Þegar við förum svo að auglýsa að það sé forskóli í skólanum hér þá mun fólk örugglega grípa það tækifæri. Við erum með yfir 90 börn hér í frístund og þegar þau munu einnig hafa aðgang að tónlistarskóla í henni, þá efast ég ekki um vinsældirnar.“

SkardshlidHfj5Sífellt yngri nemendur sækja nám í tónmennt. Mynd frá Degi tónlistarskólanna. (OBÞ)

Mun þurfa að ráða fleiri tónlistarkennara

Eiríkur kemur þarna aftur inn í samræðurnar og segist hafa einmitt keypt falleg forskólahljóðfæri svo sem tréspil, trommur og hristur. „Ég lagði áherslu á að keypt yrðu vönduð og endingargóð hljóðfæri sem verða líklega enn í notkun þegar við þrjú verðum komin á Hrafnistu. Við viljum fylla rýmin hér af nemendum og hjá okkur ríkir mikil tilhlökkun með að hefja samstarfið. Við fórum aðeins inn í skólann í fyrra, svona til að máta, og erum núna að koma formlega inn í þetta.“ 

SkardshlidHfj6Ýmis hljóðfæri eru þegar komin í kennslurýmin. Mynd/OBÞ

SkardshlidHfj7Þessi líka fíni flygill og fleiri hljófæri. Mynd/OBÞ

Hann segir þá tónlistarkennara sem hafi prófað aðstæðurnar beri þeim vel söguna og finnist umhverfið heillandi. „Ég held að eftir nokkur ár verði rifist um að fá að kenna hér og sér í lagi að geta kennt á skólatíma. Ég á pottþétt eftir að þurfa að ráða fleiri kennara á næstu árum. Það eru til margar rannsóknir sem sýna fram á gagnsemi tónlistar, ekki bara fyrir manneskjurnar sjálfar heldur sem góður grunnur fyrir annars konar nám en tónlist. Það er talað um að því yngri sem nemendur eru, því betra, enda sífellt yngri börn að hefja tónlistarnám. Við réðum inn músikþerapista í vetur, Ingu Björku Ingadóttur, sem er bæði með kennslu og ráðgjöf. Nokkrir nemenda okkar eru með alls kyns greiningar og þurfa þá kannski aðeins öðruvísi nálgun.“

SkardshlidHfj8Dæmigerð forskólaleikföng. Mynd/OBÞ

Vandamálin leyst á kennarastofunni

Það er þétt setið í tónlistarskólanum við Strandgötu og segir Eiríkur þungann á starfinu vera seinni part dags, en með aðstöðunni í Skarðshlíð verði hægt að reikna með að nemendur sem búi á Völlunum geti sótt sína kennslu þar. Hann þagnar í þrjár sekúndur og segist svo vera með hugmynd, sem hann beinir til Ingibjargar. „Ég gæti boðið upp á valfag hjá ykkur í vetur fyrir unglinga, í stað þess að taka þá úr tímum eins og til stóð. Ég kem úr þannig umhverfi fyrir norðan í Eyjafirði. Þar er blandaður skóli á einum stað og það auðveldar allt samstarf og vandamálin voru leyst á kennarastofunni. 30-50% nemenda eru að jafnaði einnig í tónlistarnámi. Þegar fram í sækir gætu vel orðið að lágmarki 20% nemenda hér, eða u.þ.b. 100 nemendur.“ Ingibjörg tók að vonum vel í hugmynd Eiríks sem verður rædd nánar og endurspeglar hið skapandi skólastarf og samstarf sem á sér stað í Skarðshlíðinni.

SkardshlidHfj96 ára bekkur í útikennslu fimmtudag í sl. viku. Mynd/OBÞ

Umhverfið óspart notað

Ingibjörg, Berglind og Eiríkur eru sammála um að Vellirnir séu ört vaxandi og öflugt samfélag og Eiríkur segir að ef hann væri með börn á grunnskólaaldri myndi hann velja að búa á Völlunum. Svo sé einstakt að svona mikil samfélagsþjónusta sé þegar risin í hverfi sem er bara rétt að byggjast upp. „Verktakarnir sem byggðu skólann kölluðu t.d. útileiksvæði leikskólans Rolls Royce-inn vegna þess að þar er svo einstaklega falleg og ósnortin náttúra í umhverfinu. Við höfum líka orðið vör við að börnin kalla síður eftir leikföngum í svona umhverfi. Að auki þá nýtum við umhverfi skólabyggingarinnar óspart til að auka við fjölbreytni, sveigjanleika og þróun í skólastarfi,“ segir Berglind.  

Viðtal birtist í Hafnfirðingi 9. september 2020