Fréttir




  • SolvangurNyttUtlit

Staða mála á Sólvangi

1. nóv. 2019

Nýtt og glæsilegt 60 rýma hjúkrunarheimili á Sólvangi í Hafnarfirði var opnað formlega þann 17. júlí síðastliðinn. Nú er kominn rétt um mánuður síðan íbúar á gamla Sólvangi fluttu yfir á þann nýja og ekki annað að sjá en að þeim líki vel nýja búsetan enda aðstaða og þjónusta til fyrirmyndar og útsýnið fallegt. Sóltún öldrunarþjónusta ehf. annast rekstur starfseminnar sem fram fer í húsinu í dag.

  • 60 íbúar eiga nú heima á nýja Sólvangi
  • 14 dagdvalarrými fyrir aldraða eru áfram á 1. hæð gamla Sólvangs
  • 12 dagdvalarrými fyrir heilabilaða munu opna á næstu mánuðum á 1. hæð gamla Sólvangs
  • 38 biðrými eru nú á 2. og 3. hæð gamla Sólvangs
  • Til framtíðar munu 33 ný hjúkrunarrými líta dagsins ljós á gamla Sólvangi
  • Sjúkraþjálfun er nú á jarðhæð á nýja Sólvangi


Neðsta hæðin í gamla Sólvangi

Á neðstu hæðinni í gamla Sólvangi eru áfram 14 dagdvalarrými fyrir aldraða og stendur til að 12 dagdvalarrými fyrir heilabilaða verði opnuð þar á næstu mánuðum. Hafnarfjarðarbær fékk rekstrarheimild fyrir þessum 12 nýju dagdvalarrýmum sama daga og nýtt hjúkrunarheimili var opnað í sumar. Þá lá ekki fyrir hvar hjúkrunarrýmin yrðu hýst en ákvörðun hefur verið tekin um að breyta og bæta fyrstu hæðina í gamla Sólvangi fyrir þessi sérhæfðu rými. Alzheimersamtökin hafa verið faglegur bakhjarli Hafnarfjarðarbæjar í mörkun á þjónustu og í ferlinu öllu og eru meðal annars uppi hugmyndir um sveigjanlegri þjónustu og víðari opnunartíma en verið hefur. Í Hafnarfirði hefur verið rekin sértæk dagdvöl fyrir fólk með heilabilun frá árinu 2006 í Drafnarhúsi og eru þar 22 einstaklingar í dag í sérhæfðri þjónustu og þjálfun. Sérhæfð dagdvalarrými fyrir heilabilaða verða samtals 34 í bæjarfélaginu eftir að þjónustan á 1. hæð gamla Sólvangs hefur tekið til starfa.

Aðrar hæðir í gamla Sólvangi

Til framtíðar stendur til að fara í endurbætur á gamla Sólvangi þannig að koma megi upp 33 hjúkrunarrýmum til viðbótar við þau 60 rými í nýja Sólvangi sem þegar eru fullnýtt. Hafnarfjarðarbær hefur þegar fengið heimild fyrir þessum rýmum frá heilbrigðisráðuneyti enda fellur hugmyndin vel að áformum stjórnvalda um stórfellda uppbyggingu hjúkrunarrýma til ársins 2023. Framkvæmdir fyrir þessi 33 hjúkrunarrými á gamla Sólvangi fara í fyrsta lagi af stað sumarið 2020 þar sem hæðirnar tvær eru í dag nýttar sem biðrými fyrir 38 einstaklinga sem bíða þess að komast inn á nýtt hjúkrunarheimili við Sléttuveg í Fossvogi í Reykjavík.

Framtíðarsýnin er sú að Sólvangur verði heildræn þjónustumiðstöð fyrir eldri borgara í Hafnarfirði með fjölbreyttri faglegri þjónustu og þjálfun.