Fréttir




  • K_orferd-Laekjarskola-2017_mynd03

Skemmtileg og þroskandi kóraferð

11. júl. 2017

Dagana 24.-29. maí sl. fór spenntur 60 barna hópur í Kór Lækjarskóla á Norbusang ásamt sex fararstjórum, Ólöfu kórstjóra og Smára meðleikara kórsins. Það var sungið, tekið þátt í smiðjum þar sem kórfélagar frá Lækjarskóla sóttu kvikmyndaleiksmiðju og indverska tónlistarsmiðju. Þá voru haldnir sameiginlegir tónleikar allra kóranna þar sem áhersla var lögð á vináttu og kærleika en einnig sungu kórarnir sín lög fyrir hver aðra einn daginn.

Vel heppnuð og fróðleg ferð

Að sögn fararstjóra var ferðin mjög vel heppnuð og skemmtilegir krakkarnir í ferðinni. Þetta hefði verið fróðlegt fyrir þau að upplifa að fara á samnorrænt kóramót og mikill lærdómur og reynsla sem þau fengu. Þau stóðu sig líka einstaklega vel á tónleikunum sem þau héldu sérstaklega líkt og aðrir kórar gerðu sömuleiðis. Kórstjórarnir, Ólöf og Smári, eiga hrós skilið fyrir starf sitt með kórnum.

 Norbusang - samnorrænt barna-/unglingakóramót

Norbusang er samnorrænt barna-/unglingakóramót sem í ár var haldið í bænum Os skammt fyrir utan Bergen í Noregi. Þetta er í sjöunda skiptið sem Lækjarskólakórinn fer á Norbusang og hefur kórinn því heimsótt öll Norðurlöndin á mótsferðum sínum til þessa. Norbusang er samstarfsverkefni norrænna barnakórasambanda og hófust kóramótin árið 1987 og hafa verið haldin árlega frá árinu 1991. Norbusang hefur þrisvar sinnum verið haldin á Íslandi (2000, 2006, 2013) og verður haldið á Íslandi 2018. Samhliða kóramótunum sjálfum hefur Norbusang staðið fyrir margvíslegri fræðslu fyrir kórstjóra.