Fréttir



Fréttir

  • IMG_7143

Samstarfsverkefni um þjónustu við fatlað fólk

1. okt. 2019

Hæfingarstöðin í Bæjarhrauni er þátttakandi í Erasmus+ verkefni um hugmyndafræði og nálgunarleiðir í þjónustu við fatlað fólk. Um er að ræða tveggja ára samstarfsverkefni milli þriggja þjóða, þ.e.a.s. Íslands, Litháen og Ungverjalands sem ber yfirskriftina „Communication is the path to integration“ eða „Samskipti eru leið til samþættingar“.

Áhersla á notkun óhefðbundinna tjáskipta

Hæfingarstöðin hefur frá upphafi starfseminnar árið 1991 lagt áherslu á að styrkja þjónustunotendur með langvarandi stuðningsþarfir í notkun óhefðbundinna tjáskipta (AAC). Í flestum tilfellum hafa þeir notað Bliss-tungumálið frá barnsaldri sem samanstendur af um 5000 táknum sem notuð eru til tjáskipta. Þau eru notuð sem benditákn á töflu og/eða í fartölvum og spjaldtölvum sem gjarnan er stýrt t.d. með augnstýribúnaði eða höfuðbúnaði, fer það eftir hreyfigeta notandans. Fyrsti hluti þessa Erasmus + verkefnis fór fram í Litháen í maí s.l. þar sem þjóðirnar þrjár hittust í vikutíma; fjórir frá Íslandi, þrír frá Litháen og þrír frá Ungverjalandi. Þar voru ýmsar áhugaverðar þjónustuleiðir kynntar.

Hópurinn heimsótti Hafnarfjörð í nýliðinni viku

Annar hluti samstarfsverkefnis var haldinn í nýliðinni viku, hér í Hafnarfirði og það meðal annars í Hæfingarstöðinni. Þar fékk hópurinn kynningu á tjáskiptaþjálfuninni, Snoezelen hugmyndafræðinni, Intensive Interaction (áköf samskipti) og Þjónandi leiðsögn (GTI) ásamt öðrum starfsháttum og skipulagi. Einnig fékk hópurinn kynningu frá Rannveigu Einarsdóttur, sviðsstjóra fjölskyldu- og barnamálasviðs hjá Hafnarfjarðarbæ, um Hafnarfjörð í heild sinni og þjónustu sveitarfélagsins. Hrönn Hilmarsdóttur, deildarstjóri í málefnum fatlaðs fólks, kynnti þjónustu sveitarfélagsins við fatlað fólk. Til viðbótar var hópunum boðið á kynningar á ýmsum þjónustustöðum bæjarins sem og annarstaðar á höfuðborgarsvæðinu. Þriðji og síðasti hluti verkefnisins mun fara fram í Ungverjalandi vorið 2020 þar sem hópurinn mun fá kynningu á m.a. hugmyndafræði og nálgunarleiðum sem notaðar eru í þjónustu við fatlað fólk þar í landi.

Ferð hópsins til Litháen

Hér má sjá myndband sem unnið var eftir heimsóknina til Litháen í maí 2019. Myndband frá ferðinni frá sjónarhorni Sigurjón sem er einn af notendum þjónustunnar.  

https://www.youtube.com/watch?v=uMithyqEIho

Nánari upplýsingar fyrir áhugasama um einstakar þjónustuleiðir