Fréttir




  • Flokkid

Plast áfram á endurvinnslustöðvar fram í júní

14. maí 2020

Meðfylgjandi tilkynningu er að finna á vef Sorpu 

Kári vindflokkari fyrir plast verður úr notkun í maí vegna uppsetningar á nýrri flokkunarlínu í móttökustöð. 

Í byrjun júní 2020 tekur SORPA nýja gas- og jarðgerðarstöð í notkun í Álfsnesi (GAJA) en þar verður lífrænum hluta heimilisúrgangs umbreytt í jarðvegsbæti og metan. Til að mæta þörfum vinnslunnar í GAJA og til að auka endurnýtingu heimilisúrgangs er nú unnið að uppsetningu vélrænnar flokkunarlínu í móttöku- og flokkunarstöðinni í Gufunesi.

Nýja vinnslulínan mun innihalda sex málmskiljur, sigti og annan búnað til að aðskilja lífrænan hluta heimilisúrgangsins frá ólífrænum efnum, s.s. plasti og öðru sem þar kann að leynast. Einnig verður þar nýr vindflokkari sem mun aðskilja létt efni, s.s. plast, pappír og textíl frá timbri, gleri og öðrum eðlisþyngri efnum.

Kári vindflokkari flytur í Álfsnes

Breytingar í móttökustöðinni fela m.a. í sér flutning á Kára, vindflokkara fyrir plast í poka, og verður hann óvirkur á meðan á framkvæmdum stendur. Kári er búnaður sem notaður er til að flokka plast í pokum frá heimilisúrgangi í Hafnarfirði, Garðabæ, Mosfellsbæ og Seltjarnarnesi. Gert er ráð fyrir að ljúka uppsetningu vinnslulínunnar í kringum 20. maí og taka þá við prófanir á búnaði. Gera má ráð fyrir að vinnslulínan, að Kára meðtöldum, verði komin í fulla virkni fyrri hluta júní.

Íbúar í þeim sveitarfélögum sem skila plasti í pokum með heimilissorpi eru því áfram beðnir um að skila flokkuðu plasti á grenndarstöðvar eða á endurvinnslustöðvar. Við biðjumst velvirðingar á þeim óþægindum sem þetta kann að valda en hlökkum jafnframt til að taka í notkun nýjar og enn betri vinnsluaðferðir sem munu auka nýtingu heimilisúrgangs verulega.