Fréttir




  • Veistu_hvad_ma_fara_i_klosettid

Piss, kúkur, klósettpappír! Klósettið er EKKI ruslatunna

19. nóv. 2020

Í dag er alþjóðlegi klósettdagurinn og því tilvalið að kynna nýtt samvinnuverkefni sem hefur það að markmiði að draga úr rusli í fráveitu og þar með álagi á umhverfið.  Verkefnið „bara piss, kúk og klósettpappír í klósettið“ er samvinnuverkefni Umhverfisstofnunar og Samorku í samstarfi við Samband íslenskra sveitarfélaga og heilbrigðisnefnda á landinu. Með jákvæðum, hnitmiðuðum og einföldum skilaboðum eru íbúar sveitarfélaga og starfsfólk fyrirtækja og stofnana hvött til að setja bara piss, kúk og klósettpappír í klósettin. 

Klósettið er EKKI ruslatunna!

Á alþjóðlega klósettdeginum er tilvalið að hrinda af stað átaki sem miðar að því að minna fólk á hvað má fara í klósettið sem er þegar uppi er staðið aðeins þrennt: Piss, kúkur og klósettpappír. Klósettið er EKKI staður fyrir eyrnapinna, bómull, blautklúta, smokka og annað rusl. Þessir hlutir eiga heima flokkaðir í viðeigandi ruslatunnur.

Allar-1x1

Á hverjum degi berst gríðarlegt magn af rusli í fráveitukerfi sem veldur stíflum í kerfinu og oft á tíðum miklu tjóni. Úrgangur í fráveitu er vandamál alls staðar en auk þess að valda skaða á umhverfi og rekstri fráveitukerfa, verða sveitarfélög og þar með íbúar fyrir miklum sameiginlegum kostnaði vegna dæluhreinsunar, bilunar á búnaði og förgunar úrgangs sem berst í fráveitukerfin. Þá hafa húslagnir einnig stíflast vegna m.a. blautklúta og þá getur beinn kostnaður fyrir íbúa orðið umtalsverður.

VISSIR ÞÚ að:

  • Hver einstaklingur notar að meðaltali 140 lítra af vatni á dag.
  • Blautþurrkan er martröð í pípunum og eitt helsta vandamálið. Líka blautþurrkur sem merktar eru „flushable“
  • Blautþurrkur, bleyjur, dömubindi, eyrnapinnar, smokkar, tannþráður, túrtappar, trefjaklútar, fita og olíur eru meðal þess sem ekki á heima í klósettinu. Rétt flokkun í viðeigandi ruslatunnur er málið.
  • Lyfjaleifum má alls ekki sturta í klósettið heldur á að fara með þær í næsta apótek eða endurvinnslustöð. Lyfjaleifar sem finnast í íslenskum vötnum og sjó geta haft skaðleg áhrif á sjávar- og landdýr.

Leggjum okkar að mörkum, notum klósettið rétt og fræðum fólkið í kringum okkur!
Minnkum magn óæskilegra hluta sem berast í fráveituna og þar með tilfallandi kostnað!

Nánari upplýsingar má sjá á vefsíðunni www.klosettvinir.is