Fréttir



  • IMG_4860

Nýtt samkomulag um sorphirðu

22. jún. 2022

Innleiðing á nýju fyrirkomulagi hefst vorið 2023 – svar við ákalli íbúa

Hafnarfjarðarbær og Terra ehf hafa gert með sér samkomulag um sorphirðu frá heimilum í Hafnarfirði frá vori 2023 til ársins 2031 og frá stofnunum sveitarfélagsins til 2026. Sorphirða sveitarfélagsins var boðin út nýlega  og reyndist Terra ehf hlutskarpast. Skilmálar útboðs á sorphirðu hafa tekið umtalsverðum breytingum og tala nú í takti við sameiginlega yfirlýsingu sveitarfélaganna á höfuðborgarsvæðinu um innleiðingu á einu og samræmdu sorphirðukerfi og sérsöfnun á lífrænum eldhúsúrgangi. 

IMG_4850

Rósa Guðbjartsdóttir bæjarstjóri og Valgeir M. Baldursson forstjóri Terra handsöluðu samkomulag um sorphirðu sveitarfélagsins á dögunum. 

Vorið 2023 hefst losun á fjórum flokkum í Hafnarfirði

Terra mun taka við sorphirðu Hafnarfjarðarbæjar vorið 2023 þegar samningur við núverandi þjónustuaðila rennur út. Samhliða hefst losun á fjórum flokkum af sorpi við heimili og stofnanir í Hafnarfirði. Úrgangsflokkarnir eru:

  • Lífrænn eldhúsúrgangur
  • Blandað heimilissorp
  • Pappír og pappi
  • Plastumbúðir

 

Terra2Bílar Terra munu alfarið keyra á metanorku. Þjónusta Terra í Hafnarfirði mun hefjast á vormánuðum 2023. 

Almennt viðmið fyrir hvert heimili verða tvær tvískiptar tunnur. Ein með sitthvoru hólfinu fyrir lífrænan eldhúsúrgang og blandaðan úrgang og önnur með hólfum fyrir plastumbúðir annars vegar og pappír og pappa hins vegar. Annað fyrirkomulag verður á tunnum í fjölbýli og við stofnanir. Ítarlegri upplýsingar um framkvæmd og fyrirkomulag verða kynntar þegar nær dregur innleiðingu á breyttu fyrirkomulagi.

Svar við ákalli íbúa á höfuðborgarsvæðinu

Á vormánuðum 2022 undirrituðu fulltrúar sveitafélaganna á höfuðborgarsvæðinu sameiginlega yfirlýsingu um samstarf vegna sorphirðu. Íbúar á höfuðborgarsvæðinu hafa lengi kallað eftir samræmdu sorphirðukerfi og flokkun við heimili og sérsöfnun á lífrænum eldhúsúrgangi. Kerfið er í samræmi við þær breytingar sem taka gildi á lögum um söfnun á úrgangi við heimili áramótin 2022-2023 og er að Norrænni fyrirmynd.