Fréttir



Fréttir

  • skograekt

Er gróðurinn þinn til vandræða fyrir aðra?

18. mar. 2013

Núna er árstíminn fyrir trjáa- og runnaklippingar, því er spurt: er gróðurinn í þínum garði til vandræða fyrir aðra bæjarbúa?

Öll viljum við geta komist leiðar okkar um gangstéttar, göngustíga og götur bæjarins án þess að rekast á eða verða fyrir skaða af trjágreinum sem vaxa út úr görðum okkar hvort sem við erum á ferð gangandi, hlaupandi, hjólandi eða akandi.

Það eru einnig dæmi um það í bænum okkar að trjágróður skyggi á umferðarmerki, götuheiti og jafnvel lýsingu, þannig viljum við ekki hafa það.

Í byggingarreglugerð frá 2012 grein 7.2.2. um tré og runna á lóðum  stendur m.a. eftirfarandi : “lóðarhafa er skylt að halda vexti trjáa og runna á lóðinni innan lóðamarka.  Sinni hann því ekki og þar sem vöxtur trjáa eða runna fer út fyrir lóðarmörk við götur, gangstíga eða opin svæði er veghaldara eða umráðamanni svæðis heimilt að fjarlægja þann hluta er truflun eða óprýði veldur, á kostnað lóðarhafa að undangenginni aðvörun”, tilvitnun líkur.

Núna þegar styttist í  vorið eru lóðarhafar hvattir til að snyrta trjágróður sinn á lóðarmörkum eftir því sem við á og  hafa þessi mál í lagi hjá sér. 

Burt með “vandræðagróðurinn” þannig að allir megi komast öruggir og vandræðalaust leiðar sinnar.

Garðyrkjustjóri Hafnarfjarðar