Fréttir




  • AegirOrnSigurgeirsson

Hlaðvarpið VITINN - nýr þáttur er kominn í loftið!

4. okt. 2019

Nýr þáttur Vitans er kominn í loftið. Í þessum þætti ræðir Sigurjón Ólafsson sviðsstjóri þjónustu- og þróunarsviðs við Ægir Örn Sigurgeirsson deildarstjórastoðdeildar í málefnum hælisleitenda og flóttafólks í Hafnarfirði.  Ægir veitir hlustendum innsýn í sína eigin sögu og bakgrunn og fjallar um þau verkefni sem hann og samstarfsfélagar hans sinna á degi hverjum og snúa að málefnum flóttafólks og hælisleitenda. 

Hægt er að hlusta á þáttinn HÉR

Með samningum við Útlendingastofnun hefur sveitarfélagið tekið að sér þjónustu á meðal annars þeim hópi einstaklinga og fjölskyldna sem bíða úrlausnar sinna mála hér á landi samhliða því að veita alla viðeigandi þjónustu til þeirra flóttafjölskyldna sem sest hafa að í Hafnarfirði. Þjónustan felur m.a. í sér að tryggja viðkomandi fæði og húsnæði, félagsþjónustu, heilbrigðisþjónustu og túlkaþjónustu og er í þessum samhengi sérstaklega hugað að þjónustu fyrir börnin. Samhliða úthugsar sveitarfélagið leiðir, vettvang og tækifæri fyrir einstaklingana og fjölskyldurnar til að kynnast íbúum og staðháttum í Hafnarfirði og þeirri þjónustu og afþreyingu sem stendur til boða í nærsamfélaginu, s.s. bókasafn og sundlaugar.

Viðtöl við áhugaverða einstaklinga sem starf í þágu sveitarfélagsins

Í Vitanum er spjallað við áhugaverða einstaklinga sem starfa í þágu bæjarins. Þannig er tekin fyrir þjónusta sveitarfélagsins, áhugaverð þróunarverkefni og viðfangsefni á fjölbreyttu sviði. Hlaðvarpið opnar á ítarlegri umfjöllun um einstaka verkefni, þjónustu og mál sem eru mikið í umræðunni hverju sinni. Hægt er að nálgast alla þætti Vitans HÉR en einnig á hlaðvarpsveitum á borð við Spotify , Simplecast og Podcast Addict. Unnið er að því að gera Vitann aðgengilegan á fleiri veitum.

Þáttur #4: Ægir Örn,deildarstjóri stoðdeildar í málefnum hælisleitenda og flóttafólks

Í þessum þætti kynnumst við málefnum hælisleitenda og flóttafólks hjá Hafnarfjarðarbæ. Einnig kynnumst við starfsmanninum Ægi Erni Sigurgeirssyni sem gegnir stöðu deildarstjóra stoðdeildar í málefnum hælisleitenda og flóttafólks. Ægir er litríkur karakter og hefur mjög áhugaverðar sögur að segja frá sínum uppvexti, erfiðri lífsreynslu, skólagöngu, lífi bakarans, kennarans, félagsráðgjafans, handboltadómarans og skýrum markmiðum sem hann hefur sett sér í lífi og starfi.

Upptökudagur: 20. september 2019.