Fréttir



  • Eldgos

Hættustigi vegna eldgoss í Meradölum aflýst

12. sep. 2022

Frá Almannavörnum: Hættustigi vegna eldgoss í Meradölum aflýst / Óvissustigi vegna jarðhræringa á Reykjanesskaga aflýst

Ríkislögreglustjóri í samráði við lögreglustjórann á Suðurnesjum ákvað þann 8. september síðastliðinn að aflýsa hættustigi vegna eldgoss í Meradölum á Reykjanesskaga. Jafnframt er aflýst óvissustigi almannavarna vegna jarðhræringa á Reykjanesskaga. 

Virkni legið niðri í tæpar þrjár vikur 

Virkni í gígunum í Meradölum hefur legið niðri í tæpar þrjár vikur og óróamælingar hafa verið í samræmi við það. Enn er fylgst vel með svæðinu með tilliti til aukinnar skjálftavirkni, óróa og landbreytinga. Búast má við innskotavirkni og jarðskjálftum á Reykjanesskaga á næstu misserum og er fólk því hvatt til þess að ganga vel frá innanstokksmunum til að koma í veg fyrir líkamsmeiðsl og tjón. Við gosstöðvarnar starfa nú landverðir. Þeir hafa m.a. eftirlit með umferð og umgengni fólks. Lögregla og björgunarsveitir koma til með að sinna útköllum og hjálparbeiðnum en dregið verður úr viðveru þeirra á svæðinu.

Varhugavert er að fara út á hraunið en gígar og eldhraun njóta sérstakrar verndar samkvæmt ákvæðum náttúruverndarlaga.