Fréttir




  • VeljumGraenuLeidina2020

Evrópska samgönguvikan 2020 er hafin!

16. sep. 2020

Þema Samgönguviku ársins 2020 er Veljum grænu leiðina. 

Evrópska samgönguvikan hefst í dag , á Degi íslenskrar náttúru og nú í ár undir yfirskriftinni „Veljum grænu leiðina“. Samgönguvikan, sem hefur þann mikilvæga tilgang að hvetja til vistvænna samgangna,  stendur yfir dagana 16. - 22. september næstkomandi. Í ár er sjónum einkum beint að þeirri jákvæðu þróun að æ fleiri ferðist milli staða á vistvænan hátt og þannig hefur fjöldi þeirra sem nota aðra samgöngumáta en einkabílinn aukist.  

Hafnarfjarðarbær tekur þátt í samgönguvikunni ásamt sveitarfélögum víðs vegar um allt land. Bílastæði við Strandgötu í Hafnarfirði verður tyrft í vikunni og er framkvæmdin táknrænt framlag sveitarfélagsins. Með því að skipta út fráu malbikuðu svæði í grænt svæði er gangandi og hjólandi vegfarendum gefið meira rými í miðbænum á kostnað bíla.  

Samgönguvika í ár einkum áberandi á samfélagsmiðlum

Samgönguvika í ár verður einkum áberandi á samfélagsmiðlum. Fjallað verður um hvaða lærdóm hafi mátt draga af samgöngum í kórónuveirufaraldri og útgöngubanni ásamt því sem hjóla- og göngustígar á höfuðborgarsvæðinu verða kynntir. Almenningi er jafnframt boðið að taka þátt í könnun undir yfirskriftinni „Hvaða samgöngukrútt ert þú?“ þar sem með gamansömum hætti er bent á vistvæna valkosti við einkabílinn. Samgönguvikustrætisvagn ekur um götur og stræti höfuðborgarinnar alla evrópsku samgönguvikuna. 

Samgöngumátar sem hafa jákvæð áhrif á umhverfi og andrúmsloft

Frá árinu 2002 hafa borgir og bæir á Íslandi tekið þátt í samstilltu átaki sveitarfélaga í Evrópu um að ýta undir sjálfbærar samgöngur. Yfirskrift átaksins er Evrópsk Samgönguvika og er hún haldin 16. – 22. september ár hvert. Markmið vikunnar er að kynna íbúum í þéttbýli samgöngumáta sem allt í senn eru vistvænir, hagkvæmir og bæta heilsu fólks um leið og þeir hafa jákvæð áhrif á umhverfi og andrúmsloft. Fyrirtæki, stofnanir og félagasamtök geta einnig skráð til leiks einstaka viðburði eða aðgerðir sem ætlað er að ýta undir vistvænar samgöngur. Yfirskrift þessa verkefnis er MobilityActions á ensku sem hefur verið þýtt sem Samgönguplús á íslensku. Frekari upplýsingar um Evrópska samgönguviku á Íslandi má finna á Facebook-síðu vikunnar. Nánar má lesa um átakið á www.mobilityweek.eu.

Hvaða samgöngukrútt ert þú? 

Innra með okkur öllum leynist lítið krútt sem vill gjarnan gera sitt besta til að lifa heilsusamlegu lífi, fara sparlega með peningana sína og hlífa umhverfinu svo jörðin okkar haldi áfram að vera byggilega fyrir alla.  Í tilefni af Evrópskri samgönguviku 16. - 22. september getur þú nú fundið út úr því hvaða samgöngur henta þér best í þessari viðleitni. Samgönguviku er ýtt úr vör í ár með þessari könnun sem við hvetjum alla til að taka þátt í. 

Taktu þátt í könnun

Virkum vöðvana og veljum grænu leiðina! ....sem flesta daga ársins!