Fréttir




  • Krysuvikurkirkja-afhent

Endursmíði Krýsuvíkurkirkju fagnað

25. jún. 2020

Í vikunni var verklokum og endursmíði Krýsuvíkurkirkju fagnað við hátíðlega athöfn í Tækniskólanum að Flatahrauni í Hafnarfirði en auk skólans hafa Vinafélag Krýsuvíkurkirkju og Þjóðminjasafn staðið að verkinu. Kirkjan brann árið 2010 og var þá í eigu Þjóðminjasafnsins sem fékk kirkjuna ásamt kirkjugarði, öðrum mannvirkjum tilheyrandi staðnum og landsspildu umhverfis kirkjuna að gjöf frá bæjarstjórn Hafnarfjarðar árið 1964. Kirkjan verður flutt á grunn sinn í Krýsuvík síðar í sumar.

Ómetanlegt starf við endursmíði og mikilvæg miðlun fagkunnáttu

Vinafélag Krýsuvíkurkirkju var stofnað strax eftir brunann og gaf Þjóðminjasafnið félaginu tryggingabæturnar til að kosta efni í endurbygginguna. Samið var við Tækniskólann um að nemar þar og kennarar gæfu vinnuframlag til endurbyggingar kirkjunnar og hefur verkefnið verið nýtt til að veita innsýn í og þjálfun við að beita þeim vinnuaðferðum sem tíðkuðust við smíði timburhúsa um miðja 19. öld sem mun nýtast þeim í viðgerðum gamalla bygginga. Viðstaddir athöfnina voru auk skólameistara, bæjarstjóra, vinafélagsins og annarra velunnara kirkjunnar þeir kennarar sem unnið hafa frábært og ómetanlegt starf við endursmíðina. Það eru þeir Björn Ottó Halldórsson, Bjarni Þorvaldsson, Guðmundur Helgi Helgason, Hrafnkell Marinósson og Engilbert Valgarðsson sem hafa miðlað af kunnáttu sinni til fjölda nemenda við framkvæmd verkefnisins. 

Sjá tilkynningu á vef Tækniskólans