Fréttir




  • 5O5A0801-vef

Bleikur október í Hafnarfirði – MUNDU og verum til

12. okt. 2021

Hafnarfjarðarbær tekur virkan þátt í átaksverkefninu Bleika Slaufan í bleikum október m.a. með því að baða sig í bleikum blómum og bleiku skrauti á hjörtunum tveimur í hjarta Hafnarfjarðar; á Strandgötunni og í Hellisgerði. Þannig vill sveitarfélagið ýta undir og styðja við mikilvægt og árlegt átaksverkefni Krabbameins­félagsins sem tileinkað er baráttunni gegn krabbameinum hjá konum. Í ár er lögð áhersla á að vera til og mikilvægi þess að vera til staðar fyrir þær konur sem greinast með krabbamein, þegar tilveran breytist snögglega og við tekur tími sem getur reynst afar erfiður. Hafnfirðingurinn Alice Olivia Clarke er sjálf ein þeirra sem er sjálf í miðri meðferð við brjóstakrabbameini. Hún stendur fyrir sölu á MUNDU fylgihlutum  og samnefndum viðburði á Bleika deginum 2021.

5O5A0801-vef

Alice Olivia Clarke með Rósu Guðbjartsdóttir bæjarstjóra Hafnarfjarðar í hjarta Hafnarfjarðar sem verður bleiktóna allan október og þannig tileinkað baráttunni gegn krabbameini hjá konum.   

IMG_1647MUNDU er táknrænn og fallegur fylgihlutur. Ágóði af sölu rennur beint til Krabbameinsfélagsins. 

MUNDU er táknrænn og fallegur fylgihlutur

Hafnfirðingurinn Alice Olivia Clarke rekur verslunina TÍRA í verslunarmiðstöðinni Firði og selur þar ljómandi fylgihluti sem Alice Olivia hefur sjálf hannað og búið til frá árinu 2008. Alice Olivia er sjálf í miðri meðferð við brjóstakrabbameini og stendur hún fyrir viðburði, sýningu og sölu í Firði og vítt og breytt um miðbæinn sem hefur það að markmiði að upplýsa fólk um brjóstakrabbamein. Alice hefur í aðdraganda október 2021 hannað nýjan fylgihlut, lyklakippu og töskuskraut, sem er sérstaklega tileinkaður baráttu hennar og fjölda annarra kvenna. Fylgihluturinn er táknrænn fyrir brjóstakrabbamein og á steinninn sem klæddur er garni að tákna hnúð í brjósti kvenna. Fleiri hafnfirskar athafnakonur m.a. frá Garnbúð Eddu fyrir tilstuðlan Eddu sjálfrar hafa unnið saman að framleiðslunni og þannig aðstoðað Alice við að gera þessa hugmynd og draum hennar sjálfrar að veruleika.  Á næstu vikum og mánuðum munu fleiri MUNDU vörur verða kynntar til leiks m.a. í samstarfi við Siggu hjá Sigga&Tímó og listakonuna Emblu Sigurgeirsdóttur. Vörurnar vera bæði til sölu í Tíru í Firði og í fleiri verslunum við Strandgötuna. Framvinda og framleiðsla mun flæða og haldast í hendur við líðan Alice sem stendur í ströngu þessa dagana. 

Ágóði af sölu MUNDU rennur beint til Krabbameinsfélagsins

Ágóði af sölu þessara einstöku fylgihluta renna til Krabbameinsfélagsins og styrkja rannsóknir á brjóstakrabbameini. Fjölskylda Alice Oliviu tekur virkan þátt í verkefninu og hefur sonur hennar, myndskreytirinn Sigtýr Ægir Kárason, teiknað skýringarmynd sem sýnir hvernig hægt er að leita að æxlum í brjósti en það var nákvæmlega við slíkar þreifingar sem Alice Olivia uppgötvaði sitt eigið æxli. Myndin og upplýsingar um árlegt átak Krabbameinsfélagsins fylgja með ásamt því að prýða verslunina í Firðinum og upplýsa gesti og gangandi.

5O5A0819-vef

Bleiki dagurinn er föstudaginn 15. október
Föstudaginn 15. október nk. er hinn formlegi Bleiki dagur haldinn á landsvísu. Þennan bleika dag kl. 17 mun Alice Olivia standa fyrir viðburðinum MUNDU í Firði þar sem flott listafólk stígur á stokk gestum og gangandi til skemmtunar. Hafnarfjarðarbær hvetur Hafnfirðinga og vini Hafnarfjarðar til að fjölmenna í Fjörð á Bleika daginn og taka virkan þátt með því að styrkja átaksverkefnið, bera bleiku slaufuna, klæðast bleiku og lýsa skammdegið upp í bleikum ljóma svo allar konur sem greinst hafa með krabbamein finni stuðningi samfélagsins og samstöðu. 

Verum til fyrir konurnar í lífi okkar!