Viðburðir framundan



Viðburðir framundan
  • Tonajol

Tónajól - hátíðartónleikar nemenda

  • 8.12.2018, 14:00 - 15:30, Íþróttahúsið Strandgötu

Laugardaginn 8. desember verða tónleikar í Íþróttahúsinu við Strandgötu. Fyrri tónleikarnir verða kl. 14 og þeir síðari kl. 16. Húsið er opnað hálftíma fyrir tónleika.

Þetta er í annað sinn sem tónlistarskólinn blæs til stórtónleika en í fyrsta skipti var það á Björtum dögum 2017 þegar lög þeirra bræðra Friðriks Dórs og Jóns Jónssonar fengu að hljóma. Að þessu sinni fær skólinn til liðs við sig söngkonurnar Guðrúnu Árnýju og Margréti Eir sem báðar eru búsettar í Hafnarfirði og þekktar í íslensku tónlistarlífi. Á dagskránni eru ýmis jólalög, sum í nýjum útsetningum kennara við skólann. Í skólanum eru tæplega 600 nemendur og eru margir þeirra í hinum mörgu hljómsveitum sem eru í skólanum. Fram koma sinfóníuhljómsveit, lúðrasveit, hrynsveit, gítarsveit, klarinettusveit og flautusveit. Einnig nemendur úr söngdeild og píanódeild og eldri hópur úr forskólanum. Á annað hundrað nemenda koma fram að þessu sinni. 

Vonum við að sem flestir sjái sér fært að taka frá þessa stund og líta á þetta sem hluta af undirbúningi jólanna. Komum og hlustum á unga fólkið okkar sem á framtíðina fyrir sér.
Stefnt er að því að þetta verði árlegur viðburður í hafnfirsku menningarlífi.

Miðasala fer fram á Tix.is - sjá HÉR

Aðeins eru 500 miðar í boði í hvort skipti.
Fullorðnir 13 ára og eldri kr. 2.500.-
12 ára og yngri kr. 1.500,-

EFNISSKRÁ

  • Litli trommuleikarinn eftir Harry Simeone við ljóð Stefáns Jónssonar í útsetningu Stefáns Ómars Jakobssonar flutt af yngri strengjaleikurum, slagverki og söng.
  • Jólaforleikur eftir ýmsa höfunda í útsetningu Richard L. Saucedo. Flutt af sinfóníuhljómsveit.
  • Klukknahljóð eftir J. Pierpoint í útsetningu Þrastar Þorbjörnssonar fyrir gítara, blokkflautur og strengi flutt af nemendum í forskóladeild, gítardeild og strengjadeild.
  • Sjö litlar mýs eftir Lee Pockriss við ljóð Ómars Ragnarssonar í útsetningu Þrastar Þorbjörnssonar fyrir söng, gítar, fiðlur og selló. Flutt af nemendum í forskóladeild, gítardeild og strengjadeild.
  • Jólasnjór eftir John Denver í útsetningu Þrastar Þorbjörnssonar fyrir hrynsveit.
  • Óskasteinn eftir Leigh Harline við texta Jökuls Jörgensen í útsetningu Stefáns Ómars Jakobssonar fyrir hrynsveit, strengi og flautu. Söngur Margrét Eir.
  • Dans úr Hnotubrjótnum eftir Pyotr Tchaikovsky fyrir sinfóníuhljómsveit.
  • Döggin á rósum eftir Richard Rodgers með íslenskum texta Flosa Ólafssonar í úsetningu Robert Buckley flutt af sinfóníuhljómsveit og nemendum úr söngdeild
  • Skammdegissól eftir James Horner við texta Valgeirs Guðjónssonar í útsetningu Þrastar Þorbjörnssonar fyrir blandaða hljómsveit. Söngur Guðrún Árný.
  • Jólasyrpa eftir ýmsa höfunda í útsetningu Leroy Anderson flutt af lúðrasveit.
  • Sexhent á píanó.
  • Blíða nótt, blessaða nótt eftir Franz Gruber í útsetningu Þrastar Þorbjörnssonar fyrir gítara og strengi. Flutt af nemendum í gítardeild, strengjadeild og söngdeild.
  • Dansaður vindur (dúett) eftir Nanne & Peter Grönvall við texta Kristjáns Hreinssonar í útsetningu Þrastar Þorbjörnssonar fyrir blandaða hljómsveit. Söngur Guðrún Árný og Margrét Eir.
  • Hátíðarsyrpa. Jólasyrpa eftir ýmsa höfunda í útsetningu Audrey Snyder fyrir lúðrasveit og strengi og kór söngdeildar
  • Það á að gefa börnum brauð eftir Jórunni Viðar við ljóð Jóhannesar úr Kötlum í útsetningu Sigurðar Rúnars Jónssonar fyrir sinfóníuhljómsveit og kór söngdeildar
  • Nóttin var sú ágæt ein – lokalag eftir Sigvalda Kaldalóns við sálm Einars Sigurðssonar í útsetningu Stefáns Ómars Jakobssonar fyrir sinfóníuhljómsveit og söng. Flutt af öllum þátttakendum og salnum.