Viðburðir framundan



Viðburðir framundan
  • Hrynjandi

Sýningaropnun - Hrynjandi

  • 12.6.2021, 12:00 - 17:00, Hafnarborg

Ný sýning með verkum Guðmundu Andrésdóttur 

Laugardaginn 12. júní verður sýningin Hrynjandi með verkum Guðmundu Andrésdóttur opnuð í aðalsal Hafnarborgar. Sýningin er opin frá klukkan 12 – 17 en ávarp forstöðumanns verður klukkan 15.

Unnið í anda geómetrískrar abstraksjónar

Guðmunda Andrésdóttir var ein þeirra listamanna sem unnu í anda geómetrískrar abstraksjónar á Íslandi en hún sýndi til að mynda með Septem-hópnum á síðustu sýningu hópsins í fyrri sýningarhrinu hans árið 1952 og svo aftur á árunum 1974-88. Guðmunda var enn fremur eina konan sem sýndi með hópnum en á þessum tíma, á árunum eftir stríð, litu myndlistarmenn, konur og karlar, sérstaklega til óhlutbundins myndmáls í leit sinni að alþjóðlegu tungumáli sem tjá mætti hreinan sannleika, sameiginlegan öllum mönnum, óháð uppruna og aðstæðum, líkt og nótur tónlistarinnar.

Verk unnin í ólíka miðla

Verkin sem nú eru sýnd í fyrsta sinn í Hafnarborg eru unnin í ólíka miðla, olíumálverk, vatnslitamyndir, blýantsskissur og fleira en í þeim má greina leik listakonunnar að efninu, sem og leit hennar að eins konar æðri sannleik – í formum, lit og flæði hvors tveggja.

Það má segja að í verkunum mætast hinar eiginlegu andstæður, hin ljóðræna hneigð og regluverkið, næmnin og útreikningurinn, sem vekja spurninguna um mikilvægi þess að skynja til þess að skilja. Sumt þarfnast þó engra útskýringa, fremur en tónverk sem hrífur áheyrendur með sér í krafti tónlistarinnar, og list Guðmundu kveður sannarlega slíkan tón, í fullu jafnvægi á milli hins röklega og hins hjartnæma, hins kvenlega og hins karlmannlega. Þá var Guðmunda Andrésdóttir einstök fyrir margra hluta sakir, bæði sem listakona og sem manneskja, og framlag hennar til íslenskrar listasögu og listasamfélags vegur þungt. Hún fór vissulega sínar eigin leiðir, jafnt í lífi og leik, en laut ætíð sinni eigin hrynjandi.

Sýningarstjórar eru Unnur Mjöll S. Leifsdóttir & Hólmar Hólm

Guðmunda Andrésdóttir fæddist í Reykjavík 3. nóvember 1922 og lést 31. ágúst 2002.

Guðmunda lauk verslunarprófi frá Verzlunarskóla Íslands árið 1941 og kennaraprófi frá Konstfackskolan í Stokkhólmi 1946. Hún stundaði nám við málaraskóla Otte Skjöld í Stokkhólmi 1945-46, Listaháskólann í Stokkhólmi 1946-48, L'Académie de la Grande Chaumière í París 1951 og við L'Académie Ranson í París 1951-53. Guðmunda er einn helsti fulltrúi íslenskrar abstraktlistar. Hún hélt nokkrar einkasýningar og tók þátt í fjölmörgum samsýningum hér á landi og erlendis og var um árabil einn félaga í Septem-hópnum. Árið 1990 var yfirlitssýning á verkum hennar á Kjarvalsstöðum. Listasafn Íslands, Listasafn Reykjavíkur, Listasafn ASÍ, Listasafn Kópavogs og Colby Art Museum í Maine í Bandaríkjunum eiga öll verk eftir Guðmundu sem og einkasafnarar víða um heim. Árið 1952 fékk Guðmunda franskan myndlistarstyrk og 1971 hlaut hún tólf mánaða starfslaun ríkisins og var valin borgarlistamaður Reykjavíkurborgar árið 1995.

Verk með tilkynningu: Guðmunda Andrésdóttir, Kristallar, 1965. Í eigu Arion banka.

Frekari upplýsingar veita:

  • Unnur Mjöll S. Leifsdóttir 824 1979, sýningarstjóri,
  • Hólmar Hólm s. 663 1609, sýningarstjóri,
  • Áslaug Friðjónsdóttir, kynningarfulltrúi, s. 585 5793