Viðburðir framundan



Viðburðir framundan
  • Í sumar verður boðið upp á göngur öll fimmtudagskvöld kl. 20

Húsameistarinn í Hafnarfirði

  • 1.8.2019, 20:00 - 21:00, Hafnarborg

Í sumar er boðið upp á menningar- og heilsugöngur öll fimmtudagskvöld kl. 20. Flestar göngur taka um klukkustund og hefjast kl. 20 nema annað sé tekið fram, þátttaka er ókeypis og allir velkomnir.

1. ágúst - Húsameistarinn í Hafnarfirði

Fimmtudaginn 1. ágúst kl. 20 mun Pétur H. Ármannsson, arkitekt, leiða göngu millihúsa sem Guðjón Samúelsson, arkitekt og húsameistari ríkisins, teiknaði í Hafnarfirði, auk þess að ræða hugmyndir Guðjóns um skipulag bæjarins. Pétur vinnur nú að bók um Guðjón samhliða sýningu sem sett verður upp í Hafnarborg í vetur. Gengið verður frá Hafnarborg.

Segja má að nafn húsameistarans Guðjóns Samúelssonar hafi á sér goðsagnakenndan blæ. Hann er sá íslenski arkitekt sem flestir kannast við. Helstu byggingar hans eru fyrir löngu orðnar þjóðkunn tákn fyrir staði og stofnanir í íslensku samfélagi. Saga mannsins að baki verkunum er hins vegar fáum kunn. Guðjón var maður sem öðru fremur lifði fyrir starf sitt og sú listgrein sem hann nam og lauk háskólaprófi í fyrstur Íslendinga átti hug hans allan. Sem húsameistari ríkisins í þrjátíu ár brann hann af metnaði fyrir hönd sinnar lítils metnu þjóðar og vildi gera veg hennar sem mestan með verkum sínum.

Guðjón var frumkvöðull á mörgum sviðum og átti veigamikinn þátt í nútímavæðingu íslensks samfélags. Opinber staða hans gaf honum einstakt tækifæri til áhrifa á byggingar- og skipulagsmál heillar þjóðar sem fáum arkitektum hefur hlotnast fyrr né síðar. Verk hans voru umdeild á sinni tíð og hafa fáir listamenn mátt sæta óvægnari gagnrýni. Það kom í hans hlut að gefa bæjum og byggingum hins nýfullvalda lands áþreifanlegt form og listrænt svipmót. Fyrir þjóð sem aldrei eignaðist gotneskar kirkjur eða hallir í klassískum stíl hafa verk Guðjóns sérstaka þýðingu.

Menningar- og heilsugöngur eru á dagskrá Hafnarfjarðar öll fimmtudagskvöld yfir sumartímann. Göngurnar eru samstarfsverkefni Hafnarborgar, Byggðasafns Hafnarfjarðar, Bókasafns Hafnarfjarðar og heilsubæjarins Hafnarfjarðar.

 

Frekari upplýsingar veita:

  • Pétur H. Ármannsson, arkitekt, s. 897 0319
  • Ágústa Kristófersdóttir, forstöðumaður, s. 664 5791