Bæjarbíó



Bæjarbíó

Bæjarbíó var stofnað 1945 og er elsta starfandi kvikmyndahús landsins. Í dag þjónar Bæjarbíó fjölbreyttum tilgangi sem menningarhús Hafnarfjarðar.  

Baejarbio1

Bæjarbíó var innréttað á árunum 1942-43 af Sigmundi Halldórssyni húsameistara og Skarphéðni Jóhannssyni húsgagnaarkitekt. Það var tekið í notkun 10. janúar 1945. Mjög var vandað til hönnunar bíósins á sínum tíma. Ekki aðeins er það eina kvikmyndahúsið frá miðri 20. öld sem varðveist hefur í upphaflegri mynd heldur er þar að finna innréttingu sem einn helsti frumherji í stétt íslenskra húsgagna- og innanhúsarkitekta átti þátt í að móta og útfæra. Höfundar ámálaðra veggmynda í forsal sem eru eins konar táknmyndir fyrir Hafnarfjörð (sjómaðurinn og fiskvinnslustúlkan) voru þeir Ásgeir Júlíusson og Atli Már. Hér við bætist stórt málverk eftir listmálarann Eirík Smith af Sólvangi en hagnaðurinn af rekstri Bæjarbíós var nýttur til byggingar þessa víðkunna elliheimilis.

Árið 1970 var reglubundnum kvikmyndasýningum hætt í húsinu en Leikfélag Hafnarfjarðar fékk þar aðstöðu. Kvikmyndasafn Íslands tók við bíóinu árið 1997. Þá var ráðist í faglega endurgerð bíósalarins og hófust kvikmyndasýningar þar að nýju í desember 2001. Við endurgerðina voru upphaflegar teikningar Skarphéðins hafðar sem fyrirmynd jafnframt því sem kappkostað var að halda í veggmyndir og önnur sérkenni sem gefa bíóinu sögulegt gildi. Miklu var til kostað við endurgerð bíósins. Má nefna að kvikmyndasýningavélar eins og þær sem voru í bíóinu frá upphafi voru gerðar upp þannig að hægt yrði að sýna kvikmyndir eins og gert var þegar bíóið hóf starfsemi sína 1945. Í Bæjarbíói er nú varðveitt upprunalegt verklag við kvikmyndasýningar sem alls staðar á landinu hefur verið aflagt.

Í dag er rekstur menningarhússins í höndum Páls Eyjólfssonar og Péturs Stephensen sem hafa það að leiðarljósi að halda úti fjölbreyttri og öflugri menningarstarfsemi í Bæjarbíói.

Nánari upplýsingar á heimasíðu


Var efnið hjálplegt? Nei