Árlegir viðburðir


Árlegir viðburðir

Áramótabrenna og Þrettándagleði á Ásvöllum

Hafnarfjarðarbær og Knattspyrnufélagið Haukar standa saman að áramótabrennu á íþróttasvæði Hauka á Ásvöllum á gamlárskvöld.

Á þrettándanum 6. janúar ár hvert eru jólin kvödd með dansi og söng á glæsilegri Þrettándagleði á Ásvöllum. Jólasveinn, Grýla, Leppalúði, álfar og púkar skemmta og hátíðinni lýkur með glæsilegri flugeldasýningu Björgunarsveitar Hafnarfjarðar.

Vetrarhátíð

Vetrarhátíð verður haldin dagana 2. – 5. febrúar 2023. Megintilgangurinn er að gefa íbúum höfuðborgarsvæðisins tækifæri til að njóta menningar, lista, íþrótta og útiveru í eigin sveitarfélagi og/eða heimsækja nágranna sína í nærliggjandi sveitarfélagi. Nánar um vetrarhátíð hér.

Bjartir dagar

Bjartir dagar er menningarhátíð sem endurspeglar allt það fjölbreytta menningarstarf sem á sér stað í Hafnarfirði sem stofnanir, félagasamtök, fyrirtæki og einstaklingar standa að. Bjartir dagar hefjast síðasta vetrardag á því að þriðjubekkingar syngja inn sumarið og menningar og ferðamálanefnd útnefnir bæjarlistamann Hafnarfjarðar og stendur yfir allt sumarið. Kraftur og gróska í listalífinu í Hafnarfirði hefur meðal annars endurspeglast í viðburðinum Gakktu í bæinn. Þá opna listamenn, hönnuðir og handverksfólk vinnustofur sínar og bjóða gesti og gangandi velkomna í heimsókn.

Sumardagurinn fyrsti

Sumardagurinn fyrsti hefst á víðavangshlaupi Hafnarfjarðar í umsjón Frjálsíþróttadeildar FH. Að lokinni skátamessu í Víðistaðakirkju er haldið í skrúðgöngu á Thorsplan í miðbæ Hafnarfjarðar þar sem skátafélagið Hraunbúar sér um fjölbreytta fjölskyldudagskrá.

Sjómannadagurinn

Sjómannadagurinn hefur verið haldinn hátíðlegur í Hafnarfirði síðan 1953 enda tengist saga Hafnarfjarðar nær öll sjósókn og fiskvinnslu. Fjölbreytt dagskrá og heiðrun sjómanna fer fram við Flensborgarhöfn og Björgunarsveit Hafnarfjarðar setur upp fjölbreytt björgunarleiktæki á landi og í sjó. Við hvetjum Hafnfirðinga og gesti þeirra til þess að gera sér ferð niður að höfn á Sjómannadaginn og njóta þess sem höfnin, sem bærinn er kenndur við, hefur upp á að bjóða.

Menningar- og heilsugöngur

Yfir sumarmánuðina er boðið upp á menningar- og heilsugöngur öll miðvikudagskvöld. Flestar göngur taka um klukkustund og hefjast kl. 20 nema annað sé tekið fram, þátttaka er ókeypis og allir velkomnir. Menningar- og heilsugöngur í Hafnarfirði sumarið 2022.

Víkingahátíð á Víðistaðatúni

Víkingafélagið Rimmugýgur stendur árlega fyrir Víkingahátíð á Víðistaðatúni. Hátíðin verður haldin 14. - 18. júní 2023. Á hátíðinni fara fram bardagasýningar, leikjasýningar, bogfimi, tónlist, handverk, opinn markaður, víkingaskóli barna og veitingar til sölu. Víkingahátíð hefur verið haldin í Hafnarfirði í hartnær tvo áratugi en fyrsta hátíðin fór fram á Víðistaðatúni árið 1995.

Þjóðhátíðardagurinn 17. júní

Fjölbreytt hátíðar- og skemmtidagskrá á þjóðhátíðardaginn í Hafnarfirði teygir sig um allan miðbæinn og enginn ætti að láta Austurgötuhátíðina fram hjá sér fara. Þjóðhátíðardagurinn hefst í Hafnarfirði við fyrsta hanagal með fánahyllingu á Hamrinum. Að lokinni skrúðgöngu flytur fjallkona Hafnarfjarðar ljóð við setningu þjóðhátíðardagskrár og við tekur skemmtidagskrá víðs vegar um bæinn.

Bóka- og bíóhátíð

Bóka- og bíóhátíð barnanna í Hafnarfirði minnir á mikilvægi lestrar og bóka og tengsl þeirra við kvikmyndir. Stofnanir bæjarins standa fyrir viðburðum og fjölbreytt verkefni eru unnin í leik- og grunnskólum bæjarins.

Jólaþorpið

Jólaþorpið er opið alla laugardaga og sunnudaga á aðventunni frá kl. 13-18 og iðar af lífi og fjöri í kringum jólin. Litlu fagurlega skreyttu jólahúsin í Jólaþorpinu í Hafnarfirði eru orðin landsþekktur söluvettvangur fyrir ýmisskonar gjafavöru, handverk og hönnun sem tilvalið er að setja í jólapakkann.  Einnig eru á boðstólnum gómsætar veitingar til að borða á staðnum og  ljúfmeti til að taka með heim á veisluborðið. Vertu velkomin(n) í miðbæ Hafnarfjarðar í desember að njóta skemmtidagskrár á Thorsplani, kíkja í litlu jólahúsin og hver veit nema þú rekist á Grýlu eða jólasveinana á vappi um bæinn.


Var efnið hjálplegt? Nei