Dagforeldrar í Hafnarfirði

Dagforeldrar í Hafnarfirði eru sjálfstætt starfandi en fá starfsleyfi samkvæmt ákveðnum skilyrðum og eru háðir reglulegu eftirliti umsjónaraðila. Fjöldi barna hjá hverju dagforeldri má mest vera fimm börn samtímis. Undantekning er í hádegi milli kl. 12 og 13 en þá er heimilt að vera með allt að sjö börn. Ákvörðun um vistun barns í daggæslu er ætíð á ábyrgð foreldra.

Foreldrar hafa sjálfir samband við dagforeldra þegar leitað er eftir plássi fyrir barnið. Mælt er með að foreldrar tali við tvo eða fleiri dagforeldra áður en ákvörðun um vistun er tekin. Gagnkvæmur uppsagnarfrestur gæslusamnings milli foreldra og dagforeldris er einn mánuður og skal uppsögn miðast við  1. eða 15. hvers mánaðar. Fyrsti gæslumánuður er reynslutími

Dagforeldrar eru með eigin gjaldskrá og er þeim óheimilt að samræma gjaldskrá sína, þess vegna eru gjöld mishá frá einu dagforeldri til annars. Hafnarfjarðarbær greiðir niður daggæsluna samkvæmt ákveðnum reglum. Daggæslufulltrúi hefur umsjón og eftirlit með dagforeldrum. Ef upp kemur ágreiningur milli dagforeldris og foreldris má leita til daggæslufulltrúa með úrlausn.

Kynningarbæklingur um daggæslu.

Samningur um vistun barns hjá dagforeldri.

Samningur um vistun barns hjá öðrum en dagforeldri.

Niðurgreiðslur hjá dagforeldum (1.1. 2013).

Reglur um niðurgreiðslu hjá öðrum en dagforeldri.

Vistun breytt eða vistun lokið hjá dagforeldri.

Dagforeldrar í Hafnarfirði

síðast breytt: 3. febrúar 2013.

Reglur um niðurgreiðslur til dagforeldra

 Bæjarstjórn ákveður fjárhæð hverju sinni að fenginni tillögu fræðsluráðs. Samþykkt er að greiða mánaðarlega í ellefu mánuði á ári fjárhæð vegna dvalar barna úr Hafnarfirði hjá dagforeldri með eftirfarandi skilmálum:

1.    Skilyrði fyrir greiðslu er að foreldri eigi lögheimili í Hafnarfirði og hafi lokið hámarks fæðingarorlofi. Greiðslur hefjast í næsta mánuði eftir að barnið hefur náð 9 mánaða aldri. Greiðslur vegna barna einstæðra foreldra hefjast í mánuðinum eftir að barnið er orðið 6 mánaða.

2.    Foreldrar sækja um almenna niðurgreiðslu með því að fylla út samning um vistun barns hjá dagforeldri.  Niðurgreiðslan fer til dagforeldra samkvæmt gjaldskrá fræðsluþjónustu.

3.    Tekjulágir foreldrar geta sótt um viðbótar niðurgreiðslu sem er annars vegar 40% viðbótarniðurgreiðsla og hins vegar 20%. Tekjuviðmið og upphæðir niðurgreiðslu eru samkvæmt  gjaldskrá fræðsluþjónustu. Leggja skal fram staðfest skattframtal síðasta árs. Ef aðstæður hafa breyst á tímabilinu skal skila inn öllum upplýsingum um tekjur síðustu 3 mánaða. Auknar niðurgreiðslur eru ekki greiddar fyrr en fullnægjandi gögn liggja fyrir og eru ekki afturvirkar. Foreldrar sækja um viðbótarniðurgreiðsluna í gegnum mínar síður á  www.hafnarfjordur.is.

4.    Hafnarfjarðarbær veitir 100% afslátt af dvalargjaldi með öðru barni, ef um systkini yngri en 2ja ára er að ræða í daggæslu. Systkinaafsláttur vegna barna eldri en 2ja ára reiknast 30% fyrir annað systkini, 60% fyrir þriðja systkini og 100% fyrir fjórða systkini.

5.    Foreldrar fá afslátt af dvalargjaldi leikskóla ef þeir eru með börn samtímis í leikskóla, gegn því að framvísa til leikskólastjóra niðurgreiðslukvittun frá fræðsluþjónustu.

6.    Sérstök niðurgreiðsla er greidd vegna barna eldri en 2 ára. Dagforeldri getur að hámarki innheimt vistunargjald hjá foreldrum skv. gildandi gjaldskrá og samningi. Greiðslur hefjast í næsta mánuði eftir að barnið hefur náð 2 ára aldri. Upphæðir eru óháðar tekjum.

7.    Dagforeldrum er heimilt að taka leyfi frá daggæslunni allt að tveimur dögum á ári sem nýtast til endur og símenntunar án þess að niðurgreiðsla skerðist. Sama gildir óski dagforeldri í fullri samvinnu við foreldra að taka allt að 3 daga frí á ári. Dagforeldri ber að draga vistunargjald foreldra frá en greiðslur frá Hafnarfjarðarbæ vegna þessa daga skerðast ekki. Loki dagforeldri umfram framangreint lækkar niðurgreiðsla hlutfallslega.

8.    Dagforeldri ber að tilkynna foreldrum og daggæslufulltrúa um lokun umfram framangreinda daga eigi síðar en 20. dags mánaðar áður en leyfi hefst þannig að til lækkunar niðurgreiðslu komi í þeim mánuði er umframlokun á sér stað.

9.    Niðurgreiðsla fellur ekki niður vegna veikinda dagforeldris í allt að 10 daga á almanaksárinu.

10.    Gera skal þríhliða vistunarsamning staðfestan af foreldri, dagforeldri og daggæslufulltrúa Hafnarfjarðarbæjar. Fyrsti mánuður er reynslumánuður beggja aðila. Ákveði foreldri eða dagforeldri að barn hætti í daggæslu innan fyrsta mánaðarins er fyrirvaralaus uppsögn heimil.

11.    Þegar barn hefur verið lengur en mánuð hjá dagforeldri er uppsögn samnings með eins mánaðar fyrirvara af hálfu hvors aðila og miðast við 1. eða 15. hvers mánaðar á þar til gerðu eyðublaði.

12.    Sé um fyrirvaralausa uppsögn að ræða á samningnum af hálfu dagforeldris, skal forráðamaður fá endurgreitt fyrir það sem greitt hefur verið fyrirfram.

13.    Niðurgreiðslur eru greiddar út fyrirfram fyrsta virka dag hvers mánaðar.  Vistunarsamningum skal skilað til daggæslufulltrúa eigi síðar en 20. dags næsta mánaðar á undan.

14.    Ef dagforeldri fær ofgreidda niðurgreiðslu af einhverjum ástæðum mun fræðsluþjónustan lækka niðurgreiðslu til dagforeldris við næstu greiðslu sem því nemur eða krefjast endurgreiðslu.

Reglur þessar voru samþykktar í bæjarstjórn Hafnarfjarðar 19. desember 2011 og gilda frá 1. janúar 2012.