 |
|||||
 |
 |
 |
 |
 |
|
Fjárhagsáætlun 2010
Fjárhagsáætlun Hafnarfjarðarkaupstaðar fyrir árið 2010 ásamt þriggja ára áætlun fyrir árin 2011-2013 var samþykkt á fundi bæjarstjórnar í gær, þriðjudaginn 22. desember.
Yfirskrift fjárhagsáætlunarinnar er: Stöndum áfram vörð um velferð og grunnþjónustu.
Þrátt fyrir að fyrirséður sé umtalsverður samdráttur í tekjum bæjarsjóðs samhliða auknum útgjöldum vegna fjölskyldu- og velferðarmála, verður áfram lögð megináhersla á að ná fram hagræðingu og sparnaði í rekstri, stjórnsýslu og framkvæmdum án þess að skerða grunnþjónustu og velferð.
Framlög til velferðarmála munu aukast meðal annars með hækkun framfærslustyrkja. Almenn þjónustugjöld sem tengjast grunn- og leikskóla verða óbreytt fram að nýju skólaári og kynntar hafa verið tillögur um aukinn afslátt af fasteignagjöldum til ellilífeyrisþega og öryrkja. Hagræðingu í rekstri verður meðal annars náð með auknu aðhaldi, nýjum þjónustuútboðum, markvissri stýringu í rekstri fasteigna, lækkun launakostnaðar og öðrum aðgerðum án þess að grunnþjónusta verði skert né gæði almennrar þjónustu við bæjarbúa.
Helstu niðurstöðutölur eru eftirfarandi:
- Gert er ráð fyrir að rekstrarniðurstaða A hluta verði jákvæð um nær 668 m.kr. fyrir fjármagnsliði á árinu 2010 en hún verður jákvæð um rúmar 158 m.kr. samkvæmt útkomuspá fyrir árið 2009. Rekstrarniðurstaða eftir fjármagnsliði er áætluð jákvæð um 247 m.kr. á árinu 2010 en samkvæmt útkomuspá 2009 er rekstrarniðurstaða hins vegar neikvæð eftir fjármagnsliði um 1.552 m.kr. vegna óhagstæðra gengis- og verðlagsbreytinga.
- Rekstrarniðurstaða A og B hluta er áætluð jákvæð um 411 m.kr. á árinu 2009 en samkvæmt útkomuspá fyrir árið 2009 eru hún neikvæð um 1.948 m.kr.
- Áætlað er að heildareignir í árslok 2010, A og B hluta, verði 38.366 m.kr., eigið fé 1.362 m.kr. og skuldir 37.004 m.kr.
- Veltufé frá rekstri í A hluta á árinu 2010 er áætlað 1.164 m.kr. og samantekið fyrir A og B hluta nær 1.860 m.kr.
- Dregið hefur verið úr öllum framkvæmdum og fjárfestingum á árinu 2009 en fjárfestingaráætlun fyrir árið 2010 verður endurskoðuð þegar línur skýrast varðandi fjármögnun hverrar framkvæmdar.
Lykilforsendur:
Gert ráð fyrir að útsvarshlutfall verði óbreytt á milli ára, 13,28%. Áætlun útsvarstekna er byggð á útkomuspá ársins 2009 en gert er ráð fyrir að íbúatala verði óbreytt. Reikna má með því að launabreytingar á árinu 2010 verði óverulegar. Áætlaðar útsvarstekjur lækka um 4% á milli ára frá útkomuspá sem er raunlækkun um ríflega 8% miðað við verðlagsforsendur. Álagningarhlutfall fasteignaskatts, vatnsgjalds, holræsagjalds og lóðarleigu verður óbreytt á milli ára en sorpeyðingargjald hækkar um 10% á milli ára. Umfangsmikið endurmat á landsvísu varð á matsstofni fasteigna fyrr á árinu en það leiddi til að matsstofn Hafnarfjarðarbæjar lækkar um 3,6% á milli ára. Þessi lækkun leiðir til að tekjur vegna fasteignagjalda lækka sem nemur þessum prósentum miðað við álagningu ársins 2009.
Reiknað er með að launabreytingar á árinu 2010 verði óverulegar. Á yfirstandandi ári var farið í aðgerðir til að lækka launakostnað sem munu skila sér enn frekar á árinu 2010.
Ekki er gert ráð fyrir að þjónustugjöld bæjarins hækki þrátt fyrir miklar verðlagshækkanir á árinu 2010, en farið verður í endurskoðun á uppbyggingu gjaldskráa bæjarins og í framhaldi af þeirri vinnu verður tekin ákvörðun um breytingu á þeim.
- Meginmarkmið fjárhags- og starfsáætlunar fyrir árið 2010 eru meðal annars:
- Samdrætti í tekjum verður áfram mætt með hagræðingu og virku aðhaldi í öllum rekstri.
- Lykiláhersla verður áfram lögð á velferðarþjónustu og almannaheill.
- Tryggt verður að almenn hagræðing skerði ekki gæði grunnþjónustu.
- Heildarálögum útsvars og fasteignagjalda verður haldið óbreyttum.
- Þjónustugjöld í grunn- og leikskólum verða óbreytt út skólaárið.
- Áfram verði tryggð jöfn staða og möguleikar allra bæjarbúa, ungra sem aldinna til þátttöku og aðgengi að þjónustu og félagslegu starfi.
- Aukið þverfaglegt samstarf og eftirfylgni árangursstjórnunar verði höfð að leiðarljósi við daglega rekstrarstjórn.
- Virkt kostnaðar- og þjónustueftirlit með mánaðarlegum uppgjörum og samantektum.
- Samvinna og samráð við bæjarbúa, félög, samtök og fyrirtæki um sókn til nýrrar framtíðar.
- Sérstök áhersla verður lögð á atvinnuátak og endurmenntun fyrir ungt fólk.
- Áframhaldandi samstarf við Nýsköpunarmiðstöð og Vinnumálastofnun um atvinnuþróunarverkefni.
- Horft verður sérstaklega til nýsköpunar í atvinnumálum með áherslu á nýtingu vatnsauðlinda og gagnavera á nýjum iðnaðarsvæðum bæjarins.
- Nýtt verða öll tækifæri til atvinnusköpunar í tengslum við öfluga starfsemi og þjónustu Hafnarfjarðarhafnar.
- Endurskoðað verður skipulag nýrra byggingasvæða með breytta þörf og aðstæður á markaði í huga.
- Framkvæmdir munu hefjast við nýtt hjúkrunarheimili á árinu, í samvinnu við stjórnvöld.
- Lokið verður þeim framkvæmdum sem eru á verkáætlun hjá bæjarfélaginu og tekin ákvörðun um frekari nýframkvæmdir eftir því sem fjármögnun leyfir.
- Gæðastýring í fasteignarekstri bæjarfélagsins tryggi enn frekari hagkvæmni og sparnað fyrir bæjarfélagið.
- Leitað verði eftir samningum um frekari yfirtöku einkaframkvæmdarsamninga.
- Fjárhagsáætlun verður endurskoðuð eftir fyrstu 3 mánuði ársins.
Greinargerð fjárhagsáætlunar 2010 og 2011-2013
Fjárhagsáætlun 2010 - 2013
Fjárhagsáætlun 2010 - rekstraryfirlit
Fjárfestingar- og framkvæmdaáætlun
Aðalsjóður - sundurliðun