Bókasafn Hafnarfjarðar

Leiðarljós - hlutverk - meginmarkmið - þjónusta.

Leiðarljós:

Bókasafn Hafnarfjarðar standi jafnfætis bestu almenningsbókasöfnum heimsins hvað varðar búnað og þjónustu og efli menningu í alþjóðlegu umhverfi. Bókasafn Hafnarfjarðar á að vera menningar- og upplýsingamiðstöð, kyrrðarreitur, athvarf, unaðsreitur, samkomustaður, varðveislustaður, fyrir grúskara, lestrarhvetjandi, með vinnuaðstöðu fyrir námsmenn og nafli samfélagsins.

Hlutverk:

Bókasafn Hafnarfjarðar er upplýsinga- og menningarstofnun sem starfar samkvæmt gildandi lögum um almenningsbókasöfn. Safnið starfar í samræmi við gildandi stefnu og samþykktir Hafnarfjarðarbæjar. Út frá þeim hafa verið sett fram eftirfarandi markmið:

Meginmarkmið:

Bókasafn Hafnarfjarðar sé aðgengilegt öllum bæjarbúum, lifandi í hugskoti íbúanna sem fjölbreytt menningar- og upplýsingastofnun og hluti af daglegu lífi bæjarbúa.
Safnkostur og þjónusta uppfylli óskir og þarfir viðskiptavina og þeir hafi góðan aðgang að fjölbreyttum safnkosti til aukinnar þekkingar, þroska og afþreyingar.
Starfsemi Bókasafns Hafnarfjarðar einkennist af víðsýni og virðingu gagnvart fólki af ólíkum uppruna og stöðu.
Að auka skilning á mikilvægi þess að lesa fyrir börn frá frumbernsku til að létta þeim framtíðarnám síðar meir á ævinni og að heimsóknir í Bókasafn Hafnarfjarðar séu hluti af menningaruppeldi barna og unglinga.
Vekji og efli lestrarlöngun allra aldurshópa og standi vörð um íslenska tungu og styðji við símenntun.
Bæti tölvulæsi og auðveldi aðgang að upplýsingum á Internetinu.
Fylgist með og tileinki sér nýjungar á sviði upplýsingaþjónustu og bókasafnsþjónustu almennt. Sé í framvarðasveit almenningsbókasafna með jákvæðri, markvissri og öflugri þjónustu.
Fylgist með og tileinki sér tækninýjungar sem draga úr lestrarörðugleikum

Þjónusta:

Starfsfólk Bókasafns Hafnarfjarðar leitast við að veita góða og faglega þjónustu og bjóða almenningi fjölbreyttan safnkost og hagnýtar upplýsingar og stuðla þannig að símenntun og uppbyggilegri afþreyingu.

Veita hafnfirskum framhaldsskólanemum aðstöðu til náms.
Viðhalda tónlistardeild bókasafnsins, Friðriksdeild, og halda áfram að reka stærstu tónlistardeild á Íslandi fyrir almenning.
Veita grunn- og leikskólum Hafnarfjarðar þjónustu og taka á móti grunn- og leikskólahópum.
Sinna heimaþjónustu eins og kostur er.
Efla Milli-Reykjasamstarfið sem er samstarf fjögurra almenningsbókasafna í nágrannasveitarfélögunum Álftanesi, Garðabæ, Hafnarfirði og Kópavogi. (Mottóið fjórir fyrir einn)

Bókasafn Hafnarfjarðar starfar í samræmi við lög um almenningsbókasöfn nr. 36/1997 og yfirlýsingu Menningar- og vísindastofnunar Sameinuðu þjóðanna (Unesco) um almenningsbókasöfn frá 1994.

Markmið Bókasafns Hafnarfjarðar eru frá febrúar 2008 .