Fyrir hverja er safnið?
Bókasafn Hafnarfjarðar er almenningsbókasafn sem þjónar fyrst og fremst íbúum, fyrirtækjum og stofnunum í Hafnarfirði.

Eitt ársgjald = Fimm bókasöfn
Bókasafn Hafnarfjarðar hefur hafið samstarf við bókasöfnin í Garðabæ, Kópavogi og á Álftanesi. Samstarfið er á þá leið að hafi lánþegi gilt skírteini í einu safnanna getur hann nýtt sér þjónustu þeirra allra. Ársgjald ákvarðast af gjaldskrá safnsins í því sveitarfélagi þar sem lánþegi á lögheimili. Útlánagjöld, sektir og önnur gjöld miðast við það safn sem notað er hverju sinni. Söfnin eru samtals 5, þar sem Bókasafn Kópavogs hefur útibú í Lindasafni.

Útlánareglur:

• Hver lánþegi fær skírteini þegar hann gengur í safnið og framvísa verður því í hvert skipti til að fá bækur eða önnur gögn að láni. Skírteinið gildir einungis fyrir eiganda þess.
• Börn og unglingar innan 18 ára fá ókeypis skírteini gegn ábyrgð forráðamanns. Óheimilt er að lána fullorðnum gögn út á barnaskírteini. Eldri borgarar og öryrkjar fá einnig ókeypis skírteini en aðrir greiða ársgjald.
• Hver lánþegi ber ábyrgð á öllum þeim gögnum sem tekin eru að láni út á skírteini hans. Glatist safngagn eða skemmist í vörslu lánþega ber honum að skýra frá því og greiða bætur að mati bókavarða. 
• Útlánstími bóka, tímarita, hljóðbóka og tungumálanámskeiða er 30 dagar en skemmri tími gildir um önnur gögn, s.s. myndefni og geisladiska. Ef safnefni er ekki skilað á réttum tíma greiðast dagsektir. 
• Skilvísi og góð meðferð á safngögnum er grundvöllur góðs bókasafns.

Aðgengi fatlaðra
Gott aðgengi er að bókasafninu fyrir fólk í hjólastólum.
Lyfta er miðsvæðis í húsinu, auk þess sem nóg pláss er milli hillustæða. Starfsfólk er til þjónustu reiðubúið að aðstoða þá sem eiga erfitt með að ná upp í efri hillur. Rúmgott salerni fyrir fatlaða er á jarðhæð.

Ársgjald er 1.300 kr. en skírteini eru ókeypis fyrir börn, eldri borgara og öryrkja.